Финландын Ерөнхий сайд СаннаМарин нь худалдагч хүртэл сайд нарын танхимын тэргүүн болж чаддаг улсад амьдардгаараа бахархдаг тухайгаа мэдэгджээ. Тэрээр өөрийг нь "Ерөнхий сайд болж томорсон худалдагч" гэж тодорхойлсон Эстонийн Дотоод хэргийн сайдад ийм хариу өгсөн гэж байна. СаннаМарин "Би Финланд орноороо маш их бахархдаг. Энд ядуу айлын хүүхэд боловсрол авч амьдралдаа их зүйлд хүрэх боломжтой. Дэлгүүрийн кассчин Ерөнхий сайд болж чаддаг. Финланд улс ажилчин ангигүйгээр амьдрахгүй. Би ажилтан, мэргэжилтэн, бизнес эрхлэгч бүрийн ажлын сайшаан үнэлдэг" гэж Twitter хуудсаараа "жиргэжээ".
Эстонийн Дотоод хэргийн сайд Март Хэльме нь Мариныг "Ерөнхий сайд болж томорсон худалдагч" гэж нэрлэсэн нь хоёр улсын харилцааг нэлээд эвгүй байдалд оруулсан гэж болно.Финландын өмнө Ерөнхий сайдАнттиРинте нь төрийн өмчит шуудан холбооны ажилчдын ажил хаялттай холбоотой ээдрээний дараагаар огцорч 34 настай СаннаМарин Ерөнхий сайдаар сонгогдсон. Ингэснээр Финландад 2019 онд хоёр дахь удаагаа Засгийн газар огцорч, гурав дахь Ерөнхий сайд шинээр сонгогдож байгаа юм.
Эстонийн улс төр, эдийн засаг нь илүү чинээлэг Финландаас ихээхэн хамааралтай байдаг тул энэхүү халаа солиог Эстонийн Дотоод хэргийн сайд Хэльме нэлээд эмзэглэн хүлээн авч "Финландад болсон зүйлээс үс арзайх шиг болж байна. Нэг худалдагч Ерөнхий сайд болтол томорч байгааг бид харж байна, бас гудамжны идэвхтнүүд, боловсролгүйчүүд гэсэн хүмүүс Засгийн газрын гишүүд боллоо" гэж уулга алдсан байна.
Финланд улс нь энэ жил Европын холбоог тэргүүлж байгаа болохоор энэ мэт мэдэгдэл Европын холбоон дах Эстонийн байр сууринд эергээр нөлөөлөх нь юу л бол. Иймд Эстонийн Ерөнхийлөгч КерстиКальюлайд нь Финландын Ерөнхийлөгч СаулиНиинстётэй устаар ярьж Дотоод хэргийнхээ сайдын өмнөө уучлал гуйжээ. Тэрээр уучлал гуйж байгааг нь Ерөнхий сайд СаннаМарин ба түүний Засгийн газарт уламжилж өгөхийг хүссэнийг ёсоор болгосон гэж Финландын Ерөнхийлөгчийн хэвлэлийн алба мэдээлсэн байна.
Харин хэргийн эзэн Март Хэльме нь шинээр сонгогдсон Финландын Засгийн газар удахгүй нуран унах тул хэнээс ч уучлалт гуйхгүй гэж мэдэгдсэн байна.
СаннаМарин нь сургуульд сурах үеэсээ талхны цехэд дараа нь дэлгүүрт кассчинаар ажиллаж байсан. 2012 онд Тамперын их сургуулийн захиргааны удирдлагын бакалавраар төгсөж, 2017 онд магистрын цол хүртэж байжээ. Тэрээр Ерөнхий сайд болсны дараа бүрдүүлсэн шинэ засгийн газрынх нь 12 сайд нь эмэгтэйчүүд, долоо нь эрэгтэйчүүд.
Улаанбаатар °C 
Сэтгэгдэл (0)
Сэтгэгдэл бичигдээгүй байна