​2019 оны дэлхийн хамгийн хүчирхэг гүрнийг тодруулжээ

Америкийн U. S. News&World Report сэтгүүлээс дэлхийн хамгийн нөлөөтэй улс орнуудын жагсаалтыг гаргажээ. Тус жагсаалтыг гаргахад BAV Group консалтингийн агентлаг, VMLY&R компани ба Пенсильваны их сургуулийн дэргэдэх Уортоны бизнесийн сургуулийн шинжээчдийн судалгааг үндэслэн гаргасан байна. Судлаачид манлайлах байдал, цэргийн хүчин чадал, эдийн засаг, дэлхийн тавцан дээрх улс төрийн нөлөө, олон улсын эвсэл холбоод дах үйл ажиллагаа гэсэн таван үзүүлэлтийн талаар 20 мянган хүнээс асуулга авч харьцуулан судалжээ. Ингэхэд жагсаалтыг АНУ тэргүүлсэнд гайхалтай зүйл үгүй биз. Шинжээчид дэлхийн хамгийн хүчирхэг эдийн засагтай, хамгийн том батлан хамгаалах төсөвтэй орноор АНУ шалгарсан. Хоёрдугаар байранд ОХУ орсон бол гуравдугаар байранд БНХАУ оржээ.

Эдний араас Герман, Их Британи, Франц, Япон, Израйл, Саудын Арави, Өмнөд Солонгос гэсэн орнууд хамгийн хүчирхэг орнуудын эхний аравт оржээ. Харин дэлхийд хамгийн бага нөлөөтэй улсуудаар Словени, Словак, Латви, Литва тодорч, жагсаалтын адагт Эстони улс орсон байна.

Манай улс нь энэ жагсаалтын хоёр ба гуравдугаарт орсон улсын дунд байрлан хоёулантай нь стратегийн түншлэлийн гэрээтэй, №1 улстай нь "гуравдагч хөрш"-ийн бодлогын хүрээнд мөн л стратегийн түншлэлийн гэрээтэй.