Пакистанд уурласан өмгөөлөгчид эмнэлэг рүү дайрч сүйтгэжээ

Пакистаны Лахор хотод олон арван өмгөөлөгчид хотын зүрх судасны төв эмнэлэг рүү мод чулуугаар зэвсэглэн дайрсны улмаас гурван хүн амиа алдсан тухай тус улсын мэдээллийн хэрэгслүүд шуугьж байна. Пакистаны интернэт эх сурвалжуудын бичиж байгаагаар нэгэн өмгөөлөгч эмнэлгийн ажилтнуудтай муудалцсаны дараа хэрэг мандсан аж. Интернэтэд тархсан бичлэг дээр өмгөөлөгч гэж өөрийгөө танилцуулсан хүн бусдын адил дугаарлан зогсож хүлээхээс татгалзан эмнэлгийн ажилтнуудтай муудалцаж, улмаар гар зөрүүлэхэд ажилтнууд нийлж зодож байгаа нь гарчээ.

Гэтэл үүнээс нэг их удалгүй костюм пиджак, зангиа зүүсэн олон арван өмгөөлөгч саваа модоор зэвсэглэнПенжабын зүрхний төв рүү дайрч тоног төхөөрөмжийг нь эвдэн сүйтгэжээ. Уурлаж хилэгнэсэн өмгөөлөгчид ингээд зогссонгүй эмнэлгийн гадаа байсан түргэн тусламжийн машинууд болон дуудлагаар ирсэн цагдаа нарын машиныг шатаажээ. Зарим өмгөөлөгч нь галт зэвсэг ашиглаж байсан мэдээ байна.

Өмгөөлөгчид хэт олуул байсан тул эмч, ажилтнууд амьд гарахын тулд эмнэлгээс зугтсан аж. Үүнээс болоод яаралтай тусламж авч чадаагүй гурван өвчтөн нас баржээ.

Үймээний үеэр Пакистаны мэдээллийн сайд Файяз-уль-Хасан Чохан хэргийн газар ирж маргалдагч талуудыг эвлэрүүлэхийг оролдсон ч дайралтад өртөн золоор амьд үлдсэн байна.

Улайрсан өмгөөлөгчдийг цагдаа нар даралттай усаар шүршин тараажээ. Пакистаны Ерөнхий сайд Имран Хан энэ хэргийг нэн даруй мөрдөн шалгах даалгавар өгөөд байгаа аж.

Гэтэл тун сонирхолтой юм болж Карачи хотын өмгөөлөгчид Лахор хотын мэргэжил нэгтнүүдийнхээ үйлдлийг дэмжиж байна гэсэн мэдэгдэл хийсэн тухай "Пакистан тудэй" мэдээлжээ. Карачи хотын өмгөөлөгчид зүгээр ч нэг дэмжээгүй тэдэнтэй зохисгүй харилцсан Жиннын нэрэмжид эмнэлэг рүү дайран түйвээж Лахор хотод болсонтой адил үймээнийг давтаж чадна гэсэн мэдэгдэл хийсэн байна. Тэд "Бүх хуульчид нэгдмэл. Манай улсыг эмч нар биш хуульчид бий болгосон байдаг юм шүү" гэж мэдэгджээ.

Пакистаны Дээд шүүхийн тэргүүлэгч АсифСаид Хан Хоса нь өмгөөлөгчдийн энэ мэт авирыг эрс шүүмжилж, эмнэлэг рүү дайрах үеэр амь үрэгдсэн өвчтөнүүдийн ар гэрт эмгэнэл илэрхийлжээ.