​Энэтхэгт цагаачдад иргэншил олгох хуулийг эсэргүүцсэн жагсаал болж байна

Афганистан, Бангладеш, Пакистаны лалын шашинтан бус цагаачдад иргэншил олгохыг зөвшөөрсөн хуулийг эсэргүүцсэн жагсаал Энэтхэгийн олон хотуудад гарсан тухай CNN агентлаг мэдээлжээ.

Энэтхэгийн парламентаас лалын шашинтан бус цагаачдыг зөвхөн шашин шүтлэгийн үндэслэлээр Энэтхэгийн иргэн болохыг зөвшөөрөх хуулийн баталж. Хуулинд лалын шашинт цагаачдад иргэншил олгох тухай заалт оруулаагүй байсан нь ийнхүү эсэргүүцлийн жагсаал хийх гол шалтгаан болсон гэж байна. Жагсаалд сөрөг хүчний лалын намууд болон оюутны байгууллагуудын идэвнтүүд оролцож байгаа аж. Жагсагчид нь шинэ хуулийг шашин шүтлэгийн эрх тэгш байдлыг баталгаажуулсан Үндсэн хуулийн заалтыг зөрчсөн гэж үзэж байна. Харин Энэтхэгийн Засгийн газар нь шинэ хууль лалын шашинтнуудын эрхийг зөрчихгүй гэж мэдэгджээ. Энэтхэгийн Дотоод хэргийн сайд Амит Шах "Энэтхэгийн лалын шашинтнуудад эмээх зүйл байхгүй. Эд энэ улсын иргэд, тэр хэвээр байх болно" гэсэн тайлбар өгчээ.

Үүнтэй зэрэгцээд Энэтхэгийн Засгийн газар нь шинэ хуулийг эсэргүүцсэн жагсаал олон хүн оролцож байгаа мужуудад зэвсэгт хүчнийг бэлэн байдалд оруулжээ. Шинэ хуулийн дагуу 2015 оноос өмнө шашны шүтлэгээсээ болж Афганистан, Бангладеш, Пакистанаас дүрвэн гарсан буддист, хинду шашинтнууд, жайн, парс, сикх зэрэг үндэстний болон шашны цөөнхийн төлөөлөл болсон хүмүүс Энэтхэгийн иргэний паспорт авах боломжтой болсон.