​АНУ нь Сирийн курдуудыг Туркээс хамгаалахгүй

АНУ-ын Батлан хамгаалахын сайд Марк Эспер нь Рейганы нэрэмжит үндэсний батлан хамгаалах хэлэлцүүлэгт оролцох үеэр Сирийн курдуудын талаар ямар бодлого баримталж байгаагаа тайлбарласан байна. Тэрээр АНУ нь Сирийн курдуудад Туркээс хамааралгүй тусгаар улс байгуулахад л туслахын тулд Сирийд цэргээ байршуулж байгаа гэж хэзээ ч ярьж байгаагүй, бас курдуудад тусгаар улс байгуулахад нь туслан Туркээс хамгаална гэж хэзээ ч ярьж байгаагүй гэдгийг онцолжээ.

Мөн тэрээр "Бид хэзээ ч та нарыг Туркээс, НАТО –ийн гишүүн манай холбоотноос 70 жилийн турш хамгаална гэж ярьж байгаагүй. Энэхүү түншлэлийн хязгаар болон хэр хол явах боломжтойг бид бүгд өнөөдөр илүү сайн ойлгож байгаа байх гэж бодож байна" гэжээ.

Сайдын түншлэл гээд байгаа нь Сирийн ардчилсан хүчин нэртэй зэвсэгт бүлэглэлүүдийн эвслийг хэлж байгаа бололтой. Вашингтоны шууд оролцоотойгоор байгуулагдсан энэхүү эвслийн гол цөмийн курд үндэстнүүдийн "Ардын хамгаалагчид" нэртэй бүлэглэлүүд бүрдүүлдэг. Тэднийг Вашингтоноос зэвсэг, сумаар ханган санхүүжүүл Лалын улс болон БашарАсадын цэргийн эсрэг ажиллагаанд идэвхтэй ашиглаж байсан.

Гэвч Туркийн удирдлага нь "Ардын хамгаалагчид"-ыг өөрийн нутаг дээр нь салан тусгаарлах үйл ажиллгаа явуулдаг Курдын ажилчны намтай холбоотой гээд алан хядах бүлэглэлийн тоонд оруулсан. Улмаар Сирийн зүүн хойд нутагт курдуудын эсрэг "Энхийн булаг" нэртэй ажиллагаа явуулж эхлэхэд Америк нь Сири ба Туркийн хилийн дагуу байрлаж байсан цэргийн баазуудаа орхин явж курдуудыг золионд орхисон.

Америкчуудын энэ үйлдэл ба Туркийн цэргийн ажиллагааг НАТО-ийн гишүүн бусад орнууд эрс шүүмжилсэн ч юу ч өөрчилж чадаагүй юм. Эцэст нь, Оросын Ерөнхийлөгч Путин нь Туркийн Ерөнхийлөгчтэй уулзан хэлэлцээ хийж, хилийн дагуух курд бүлэглэлүүдийн оронд БашарАсадын армийн хүчийг оруулан, зэвсэглэсэн курдуудыг нутгийн гүн рүү холдуулахаар тохиролцсоноор курдуудыг асар их хохирол амсахаас аварсан болж таарсан.

Мөн америкчуудад хаягдсан курдууд нь БашарАсадын Засгийн газартай хэлэлцээ хийж, тодорхой хэмжээний буулт хийн тохиролцоонд хүрэхээс өөр аргагүй болсон.