​WADA Оросын цэвэр тамирчдыг хамгаалахын төлөө шийдвэр гаргасан

Дэлхийн допингийн эсрэг агентлаг (WADA) нь өчигдөр ОХУ-ыг дөрвөн жилийн хугацаатай олон улсын бүх тэмцээн уралдаанд оролцохыг нь хориглолоо. Ингэснээр Оросын бүх л спортын тамирчид Олимпын аварга, Дэлхийн аварга шалгаруулах тэмцээнүүдэд оролцох боломжгүй болсон. Зөвхөн сэргээш хэрэглээгүй гэдгээ нотолж чадсан тамирчид Олон улсын Олимпын хорооны далбаан дор оролцож болно. Европын аварга шалгаруулах тэмцээн болон Дэлхийн аваргын тэмцээнд Оросын шигшээг оролцох эсэхийг Дэлхийн хөлбөмбөгийн холбоо тусад нь хуралдан шийдвэр гаргана. Гэхдээ WADA-ийн зүгээс Оросыг харин ч зөөлөн шийтгэлээ гэсэн яриа гарчээ. Учир нь, WADA-ийн гүйцэтгэх хорооны зарим гишүүд ОХУ-ын найман жилийн хугацаатай бүх тэмцээн уралдаанаас бүрэн хасахыг санал болгож байсан ч ердөө дөрвөн жил хасаад дээр нь ОУОХ-ын далбаан дор Олимпын тоглолтод тамирчдыг нь оролцох боломж олгосон гэж байна. WADA-ийн тэргүүн КрейгРиди энэ талаар "WADA-ийн гүйцэтгэх хороо нь дээд зэргийн хатуу шийдвэр гаргасан ч энэ таагүй дуулианд холбоогүй, зөрчил гарган давуу байдал олж аваагүй гэдгээ нотолж чадах орос тамирчдыг хамгаалах боломж гаргаж өгсөн" гэжээ. Харин ОХУ-д энэ талаар огт өөр бодолтой байгаа бололтой. Интернэт дэх тайлбаруудын дийлэнх нь Орос нь АНУ, Өрнөдийн эсрэг бие даасан гадаад бодлого явуулж байгаа тул олон улсын тавцанд нэр хүндийг нь унагах, улмаар ард иргэдийнх нь дунд бухимдал төрүүлэх замаар эрх баригчдын эсрэг хөдөлгөөнийг далдуур дэмжих гэжшийтгэж байна гэсэн үзэл давамгайлж байна. Гэхдээ WADA-ийн энэ шийдвэрийг ОХУ нь Спортын олон улсын арбитрын шүүхэд давж заалдах эрхтэй юм. Оросын Ерөнхий сайд Медведев нь давж заалдах тухайгаа ч албан ёсоор мэдэгдсэн. Ингэснээр арибтрын шүүхийн шийдвэргарсны дараа л WADA-ийн шийдвэр бүрэн дүүрэн хэрэгжиж эхлэх аж.