​Японд Курилын арлуудыг эргүүлж өгөхийг шаардсан жагсаал болжээ

Япончуудын "умард нутаг" гэж нэрлэдэг Өмнөд КурилынКунашир, Итуруп, Шикотан, Хабомаи арлуудыг эргүүлж өгөхийг ОХУ-аас шаардсан жагсаал Токио хотод болсон тухай "NHK" суваг мэдээлжээ. Жагсаалд оролцогчид нь эдгээр арлыг Японы мэдэлд эргүүлэн авах хүртэл үйл ажиллагаагаа үргэлжлүүлэн явуулах тухайгаа мэдэгдсэн байна. Японд энэ дөрвөн арлыг эргүүлэн авахад зориулагдсан тусгай яам бий болгосон гэхээр умард нутгийн асуудал гэгчид маш чухал ач холбогдол өгч байгаа нь харагддаг. Токио хотноо арвахоёрдугаар сарын 1-нд болсон жагсаал ээр Окинава арал ба умард нутгийн хэрэг хариуцсан яамны сайд СэйитиЭто нь "Бид эдгээр арлын оршин суугчидтай харилцан ойлголцлоо бэхжүүлэх үүднээс солилцоо хийх цогц ажлыг явуулах болно" гэж мэдэгджээ.

Токио нь 1855 онд Оросын эзэнт гүрэн ба Японы эзэнт гүрний хооронд байгуулсан Худалдаа ба хил хязгаарын тухай бичиг гэдэг дээр үндэслэн Курилын арлуудыг өөрийн газар нутгийн хэсэг мэдэгдэн эргүүлж өгөхийг Зөвлөлтөөс шаардсаар ирсэн, дараа нь ОХУ-аас шаардсаар байгаа. 1956 онд Зөвлөлтийн удирдагч Хрущевын зөвшөөрсний дараа Москва Токио хоёр нь Хамтарсан тунхаглалд гарын үсэг зурсан байдаг. Энэ тунхаглал ёсоор Японыг Зөвлөлттэй энхийн гэрээ байгуулахыг зөвшөөрсөн тохиолдолд маргаантай арлуудын хоёрыг буцаан олгох боломжийг авч үзэж болно гэсэн байдаг. Гэвч Япон нь дөрвөн арлыг бүгдийг нь буцаан өгөхийг шаардсан тул Энхийн гэрээ байгуулагдаагүй. Оросууд нь 1945 онд Дэлхийн хоёрдугаар дайны төгсгөлөөр Зөвлөлт нь Курилын арлуудыг өөрийн мэдэлд авсан тул Японы милитаризмыг ялсан дайны үр дүнг дэлхийн нийт хүлээн зөвшөөрсөн хэвээр байсан цагт эдгээр арлуудыг буцаан олгох талаар ямар ч хэлэлцээ, яриа явуулахгүй гэсэн байр суурийг баримтлах болсон.

Японы Ерөнхий сайд АбэШинзо нь өнгөрсөн оны намар Сингапурт Оросын Ерөнхийлөгч Путинтэй уулзсаны дараагаар хоёр тал нь 1956 оны Хамтын тунхаглалын үндсэн дээр энхийн гэрээ байгуулах хэлэлцээг хурдасгахаар тохиролцлоо гэж мэдэгдэж байсан. Өөрөөр хэлбэл ядаж хоёр арлаа буцаан авах талаар яриаг үргэлжлүүлэх боломж байна гэсэн юм байна. Гэвч АНУ нь дунд ба ойрын тусгалтай пуужинг хориглох гэрээнээс гарч, Азид пуужингаа байршуулах талаар мэдэгдсэнээс хойш Оросын тал нь Япон ба Америкийн цэргийн хамтын ажиллагаатай холбоотойгоор арлуудыг буцаах талаар ихээхэн болгоомжлох болсон.