Украйны хамгийн том дулааны цахилгаан станцууд ажлаа түр зогсоожээ

Украйндаа хамгийн томд тооцогддог Бурштыний ба Приднеприйн дулааны цахилгаан станцууд ОХУ ба Беларусаас цахилгаан импортлохоо зогсоохыг шаардан ажлаа түр зогсоосон тухай "Вести.Экономика" сайт мэдээлсэн байна. Энэ оны есдүгээр сард Украйны Засгийн газар нь цахилгааны үнийн өсөлтийг зогсоох зорилгоор Беларус ба ОХУ-аас гэрээ байгуулан цахилгаан эрчим хүч импортлохыг зөвшөөрсөн юм. Гэтэл үүнээс болоод Украйны дулааны цахилгааны станцууд ашиггүй ажиллахад хүрч байна гэж мэдэгдээд ийнхүү ажлаа түр зогсоосон байна. Дулааны цахилгаан станцуудыг буцааж ажиллуулахын тулд ОХУ, Беларус улсуудаас цахилгаан импортлохоо зогсоохыг тус станцуудыг эзэд шаарджээ.

Үүнээс өмнө Украйны түлш-эрчим хүчний цогцолборын ажил олгогч компаниудын холбоо мөн л ОХУ ба Беларусаас цахилгаан импортлохоо зогсоохыг уриалсан. Энэ хоёр улсаас хямд үнэтэй цахилгаан авсан хэвээр байвал цаашдаа Украйны эрчим хүчний нүүрс олборлогч компаниудын 75 хувь нь хаагдахаас өөр аргагүй болно гэж мэдэгдэж байжээ.

Гэвч Украйны парламентын эрчим хүчний асуудал хариуцсан хороо нь эрчим хүчний салбарын энэ мэт үйлдлийг үнэ нэмэхээр авч байгаа сүрдүүлэг төдий гэж үзэж байгаа юм байна. Цахилгаан үйлдвэрлэгч хувийн компаниуд нь ажиллагаагаа зогсоохоор сүрдүүлэх замаар цахилгаан үйлдвэрлэх тарифыг нэмэгдүүлэхийг хүсэж байгаа гэж парламентад үзэж байгаа юм байна.

Ажлаа түр зогсоосон Бурштыний дулааны цахилгаан станц нь 2300 МВт-ын хүчин чадалтай, Приднеприйн Дулааны цахилгаан станц нь 1765 МВт-ын хүчин чадалтай бөгөөд хоёул Украйны тэрбумтан РинамтАхмедовын холдингийн бүрэлдэхүүнд багтдаг аж.