Этиоп гадаадын компаниудад хүнсний бүтээгдэхүүн импортлохыг зөвшөөрнө

Этиоп руу гадаадын компаниуд хүнсний бүтээгдэхүүн импортлох хориотой байдаг тул Засгийн газар нь өөрсдийн импортогч компаниудаас улаан буудай, тос, сахар зэргийг зах зээлийн үнээр худалдаж аваад иргэдийнхээ дунд хямдруулсан, хатуу тогтоосон үнээр хуваарилсаар олон жил болж байгаа аж. Гэтэл сүүлийн үед хүнсний бүтээгдэхүүний үнийн инфляц сарын 20 хувь болсон байна. Ингэж өсөх болсон гол шалтгаан нь импортолж байгаа бүтээгдэхүүнийхээ үнийг дураар өсгөж байгаа дотоодын импортлогч компаниуд гэсэн дүгнэлтийг Засгийн газар нь хийсэн тул гадаадын компаниудыг Этиопын дотоод зах зээлд хүнсний бүтээгдэхүүн бөөнөөр импортлохыг нь зөвшөөрөхөөр шийдсэн байна. Этиоп руу хүнсний бүтээгдэхүүн импортлох сонирхолтой байгаа гадаадын компаниудыг Сангийн яам, худалдааны яам, хөрөнгө оруулалтын комисс зэрэг албадын төлөөлөлтэй уулзан лиценз олгохоор болжээ. Хүнсний бүтэгдэхүүний импортын салбарт ингэж өрсөлдөөн бий болговол үнийн хөөргөдлийг бууруулна гэж тооцсон тухай "The Ethiopia Reporter" сонин мэдээлжээ.

Этиоп нь зөвхөн улаан буудай худалдан авахад жилдээ тэрбум доллар зарцуулдаг аж.