Н.Номтойбаярыг Г.Батхүү агсны хэрэгт худал мэдүүлэг өгсөн гэдгээр буруутгаж яллагдагчаар татаж магадгүй

УИХ-ын дэд дарга асан, АН-ын дэд даргаар ажиллаж байсан Г.Батхүү нь төрийн ордонд учир битүүлгээр амиа алдаад хагас жил орчим болж байна. Тухайн өдөр төрийн ордонд байсан 200 гаруй хүнээс тус хэргийн талаар гэрчийн мэдүүлэг авсан юм. Г.Батхүү агсан нь нас барахынхаа өмнө нь УИХ-ын гишүүн Н.Номтойбаярын өрөөгөөр орсон баримт хөдлөшгүй. УИХ-ын гишүүн Н.Номтойбаяр ч үүнийг үгүйсгэдэггүй юм. Талийгаач Г.Батхүүгийн ар гэрийнхэн нь УИХ-ын гишүүн Н.Номтойбаярыг буруутгаж хардаж байгаа бололтой юм. Харин УИХ-ын гишүүн Н.Номтойбаяр нь уг хэрэгт гурван удаа гэрчийн мэдүүлэг өгсөн гэдгээ тайлбарлав. Г.Батхүү агсны амиа алдсан хэргийг Улсын мөрдөн байцаах газар шалгаж байгаа. 2019 оны аравдугаар сарын 31-нд тус газрын Мөрдөн байцаах хэлтсийн дарга П.Эрдэнэбилэг нь УИХ-ын гишүүн Н.Номтойбаяртай уулзжээ. Ингэхдээ УИХ-ын гишүүн Н.Номтойбаярыг "Г.Батхүү агсныг согтууруулах ундаа хэрэглээгүй байсан гэж худал мэдүүлэг өгсөн, тиймээс эрүүгийн хуулийн 21.2 -т заасан үндэслэлээр Прокурорын байгууллагаас таныг сэжигтнээр татаж магадгүй" гэжээ. Тэрбээр талийгаачийн амиа алдсан өдрийн хоёр хоногийн дараагаас буюу 2019 оны тавдугаар сарын 19, 30 -нд, зургаадугаар сарын 18-нд ингээд нийтдээ гурван удаа гэрчийн мэдүүлэг өгчээ. Энэ талаар УИХ-ын гишүүн Н.Номтойбаяр өөрийн твиттер хуудсандаа өчигдөр орой жиргэлээ.

Г.Батхүү агсны амиа алдсан өдөр төрийн ордон хөл хөдөлгөөн ихтэй байсан. Тухайн үед хүмүүс хоорондоо чанга дуугарч, юм унах чимээ гарсан тухай гэрчүүд мэдүүлэг өгсөн байдаг. Мөн тэр өдөр УИХ-ын гишүүд төрийн ордны өрөө дамжин архидаж, МАН-ын бүлгийн хурал ч хэрүүл маргаантай өрнөжээ. Талийгаачийн баруун нүд нь хөхөрсөн байдалтай байсан тухай эх сурвалжууд хэлдэг. 2019 оны зургаадугаар сард гаргасан шүүх шинжилгээний дүнгээр талийгаач нь тархины цус харвалтын улмаас өндрөөс унаж амиа алдсан гэжээ. Харин энэхүү дүгнэлттэй ар гэрийнхэн нь санал нийлэхгүй, олон улсын байгууллагад хандсан гэх мэдээлэл бий. Шүүх эмнэлгийн хоёр дахь шинжилгээний хариуг 11-р сарын 8-нд гаргасан бөгөөд мөн л өмнөхтэй ижил дүгнэлт гарчээ. УИХ-ын гишүүн Н.Номтойбаярын хувь эзэмшдэг "МАК", талийгаач Г.Батхүү агсны "АПУ" компанийн хооронд ямар нэгэн бизнесийн харилцаа байдаггүй бөгөөд маргаан ч байхгүй аж. Ямартаа ч Г.Батхүү агсны амиа алдсан хэргийн мөрдөн байцаалтын ажиллагаа дуусч байгаа юм байна.

Тухайн үед УИХ-ын гишүүн Н.Номтойбаярын хийсэн хэвлэлийн хурлыг хүргэе.