​Туркменд ''Википедиа''-г хоригложээ

Туркменд "Википедиа" нэвтэрхий толийг Ерөнхийлөгч ГурбангулыБердымухамедвын талаарх таагүй мэдээлэл оруулсан шалтганаар хориглосон тухай "Turkmen.News" мэдээлсэн байна. Тус сайтын эх сурвалжийн мэдээлснээр хэдэн өдрийн өмнө "Википедиа" дээрх Туркмений Ерөнхийлөгчийн тухай хуудсанд шинэчлэл хийхдээ "WikiLeaks"-ийн ил болгосон АНУ-ын дипломатуудаас Бердымухамедовт өгсөн тодорхойлолтыг иш татан нэмж оруулсны дараа ийнхүү хаах арга хэмжээ авсан. Туркменд ажиллаж байсан Америкийн дипломатууд дотоод шуудан харилцаандаа Ерөнхийлөгч Бердумухамедовыг "нэр алдарт шунаг, өөнтөгч, өсөрхүү, өөрөөсөө илүү ухаантай хүнд дургүй, худалч, хартай, явцуу бодолтой, дэндүү хуучинсаг үзэлтэй, сайн жүжигчин" гэх мэтээр тодорхойлсон байжээ. Үүнийг алдарт Ассанжийн байгуулсан "WikiLeaks" сайт илчилж олны хүртээл болгосны дараа хоёр улсын харилцаанд нэлээд таагүй байдал үүссэн. Дипломатуудын захидал ил болсон хэрэг мартагдах шахаж байтал ийнхүү ахин олны хүртээл болсон нь олон улсын тавцанд өөрийгөө аль болох эергээр харуулахыг хичээн элдэв уулзалт, айлчлал хийж байгаа Бердымухамедовт таалагдаагүй бололтой.