АТҮТ-ийн Замын-Үүд дэх салбарын дарга А.Хатансайхан ЯМАР ЗОРИЛГООР албаны автомашинд хуурамч дугаар ашиглаж байна вэ

Төрийн байгууллагын удирдах албан тушаалтнууд албан хэрэгцээний автомашиныг аминдаа ашиглаж байгаа асуудлыг бид цувралаар сурвалжлан хүргэсэн. Энэ дагуу чиглэлийн төрийн байгууллагууд ч хяналт шалгалт хийж, Засгийн газрын түвшинд яригдаж эхлээд байна.

Тэгвэл албаны автомашины улсын дугаарыг дур мэдэн өөрчилж байгаа асуудлыг энэ мэдээллээр хүргэе. Хачирхалтай нь, тухайн албан тушаалтан нь энэ салбарын хууль журмыг хамгийн сайн мэдэх учиртай авто тээврийн салбарын удирдах албан тушаалтан байгаа юм.

Тодруулбал, Авто тээврийн үндэсний төвийн Замын-Үүд дэх салбарын албан хэрэгцээний 23-60 ДГС улсын дугаартай, Тоёота ланд круйзер 100 маркийн автомашин бий. Уг автомашиныг тус газрын дарга А.Хатансайхан албан хэрэгцээндээ ашигладаг байна.

Гэтэл тухайн автомашины өөрийнх нь бүртгэлтэй 23-60 ДГС улсын дугаарыг зүүхгүйгээр А.Хатансайхан дарга нь 01-86 УНҮ дугаарыг ашиглах болжээ. Автомашины мэдээллийн smartcar.mn сайтын нээлттэй мэдээллээс үзэхэд "01-86 УНҮ улсын дугаар нь 2010 оны Тоёота приус маркийн автомашинд бүртгэлтэй" байгаа юм.

2019 оны 11 дүгээр сарын 07-нд Төрийн өмчийн бодлого зохицуулалтын газраас тус байгууллагад шалгалт ирсэн байна. Энэ үеэр А.Хатансайхан нь "автомашин эвдэрсэн" шалтгаанаар тухайн автомашиныг үзлэгт хамруулаагүй болохыг эх сурвалж мэдээлж байна.

Авто тээврийн байгууллагын нэгэн салбарыг удирдаж байгаа алба хаагч ийнхүү өөрөө авто тээврийн бүртгэлийн зөрчил гаргаж байгаа нь асуудал юм. Үүнээс том асуудал нь А.Хатансайхан дарга албан хэрэгцээний автомашины улсын дугаарыг ямар зорилгоор өөрчлөн, өөр автомашинд бүртгэлтэй дугаар ашиглаж байгаа нь бүр ч том асуудал дагуулж байж болзошгүй. Учир нь хуурамч дугаар зүүсэн уг автомашинаар хэд хэдэн удаа хил нэвтэрсэн мэдээлэл байна. Энэ асуудлыг холбогдлох хууль хяналтын байгууллагууд шалгах биз ээ.

А. Хатансайхан нь биеийн тамирын багш мэргэжилтэй. 2016 онд АТҮТ-ийн Замын-Үүд дэх салбарын даргаар томилогдсон. 2012 оноос хойш аймгийн ИТХ-ын төлөөлөгчөөр ажиллаж байгаа юм байна.