​Хятадын ''Huawei'' компанийн төхөөрөмжийг хожим сүйрэл дагуулах аюултай гэв

АНУ-ын Үндэсний аюулгүй байдлын зөвлөх Роберт О'Брайен нь Хятадын Huawei компанийн харилцаа холбооны тоног төхөөрөмжөөс татгалзахыг уриалсан тухай "Reuters" агентлаг мэдээлсэн байна. Галифакс хотноо болж байгаа аюулгүй байдлын талаарх форумд оролцох үеэрээ Роберт О'Брайен нь Канадын төлөөлөгчдөд хандан ийм сэрэмжлүүлэг хийсэн гэж байна. Тэрээр Канадыг АНУ-ын ойрын холбоотон гэдгийг сануулаад, Канадын Засгийн газар нь Huawei компанийн тоног төхөөрөмж гэдэг гаднаа үзэмжтэй ч дотроо сүйрлийн аюул тээсэн "Троян морь"-ийг хэрэглэвэл улсын тагнуулын албад хоорондын мэдээлэл солилцоонд бэрхшээл үүснэ гэжээ. Мөн "Тэд Huawei-аа Канад эсвэл Өрнөдийн өөр ямар нэг улсад нийлүүлж эхэлбэл хүн бүрийн эмнэлгийн бүртгэл, банкны данс, нийтийн сүлжээний нийтлэл болгоныг бүртгээд авна. Тэд канад хүн бүрийн тухай бүгдийг мэддэг болно" гэж онцолжээ.

Канадын тав дахь үеийн үүрэн холбооны дэд бүтцэд Huawei-н төхөөрөмжийг ашиглах талаарх эцсийн шийдвэрийг тус улсын парламентын сонгууль хүртэл хойшлуулаад байсан. Канадын парламентын сонгууль аравдугаар сарын 21-нд болж өнгөрсөн хэдий ч Ерөнхий сайд ЖастинТрюдо нь Засгийн газрынхаа байр суурийг одоо болтол тодорхойлж илэрхийлээгүй байгаа юм. АНУ нь дэлхий даяар бүх хамтрагч, холбоотнууддаа хандан Huawei компанийг Хятадын тагнуулын албадтай холбоотой байж болзошгүй тул тоноглэл хэрэгслийг нь ашиглахаас татгалзахыг уриалаад байгаа юм.