Анхааруулга: Гоёлын гоо заслын газарт мэс ажилбар хийхийг хориглоно

Иргэнээс ирүүлсэн гомдлын дагуу Сүхбаатар дүүргийн нэгдүгээр хороо, UB-mart худалдааны төвийн тавдугаар давхар 516 тоотод байрлах "Queen eyebrow studio" гоо заслын газрын үйл ажиллагаанд НМХГ-аас эрүүл ахуй, халдвар хамгааллын хяналтын чиглэлээр хяналт шалгалт хийлээ.

Шалгалтаар тус газар нь Эрүүл ахуйн тухай хуулийн 20 дугаар зүйлийн 20.1.5 дахь заалтаар хориглосон "гоёлын гоо заслын газарт арьс, салстыг цоолж гэмтээх мэс ажилбар хийх" үйлчилгээ буюу хөмсөгний шивээс хийх үйлчилгээ үзүүлж байсан тул Зөрчлийн тухай хуулийн тусгай ангийн 6.17 дугаар зүйлийн 9 дэх заалтын дагуу хялбаршуулсан журмаар зөрчил шалган шийдвэрлэх ажиллагаа явуулан, торгох шийтгэл оногдуулан, улсын байцаагчийн албан даалгавар өгсөн байна.