​Нидерланд хорт утааны ялгаралтыг багасгахын тулд машины хурдны дээд хязгаарыг 100 км/ц болгон бууруулав

Нидерланд нь агаар мандалд хаягдаж байгаа азотын ислийн хэмжээг багасгах зорилгоор авто зам дээрх өдрийн цагт мөрдөх дээд хурдыг 130 км/ц-аас бууруулан 100 км/ц болгох хууль баталжээ. Хурдны шинэ горимыг 2020 оноос мөрдөж эхэлнэ. Гэхдээ үдэш болон шөнийн цагийн хурдны дээд хязгаар нь 130 км/ц хэвээр байх аж.

Нидерландын Ерөнхий сайд Марк Рютте нь хурдны дээд хязгаарыг ингэж багасгаж байгаа нь хэнд ч таалагдахгүй байгаа хэдий ч зайлшгүй авах ёстой арга хэмжээ гэж тайлбарласан байна.

Хурдны дээд хязгаарыг багасгах нь агаар мандалд хаягдаж байгаа хорт утааг багасгах цогц арга хэмжээний нэг нь гэдгийг Нидерландын Засгийн газар онцолсон байна. Хурдны дээд хязгаарыг багасгасны дараагаар фермерийн аж ахуйнуудад зориулсан тэжээл дэх уургийн хэмжээг багасгах замаар азотын хаягдлыг багасгах заалтыг батлуулахаар ажиллаж байгаа аж.

2019 оны тавдугаар сард Нидерландад үйл ажиллагаа явуулдаг барилгын болон дэд бүтцийн бүх төслүүдийг хорт бодисын хаягдлыг хэм хэмжээнд нийцэж байгаа талаар заавал шалгуулдаг байх шийдвэрийг тус улсын Дээд шүүхээс гаргасан. Үүнээс болоод Нидерландад явагдаж байсан 18 мянган объектын барилгын ажлыг зогсоожээ.