СИРИ УЛС АЛАН ХЯДАГЧДЫГ ИЛРҮҮЛЭХ ТАЛААР ЕВРОПЫН ХОЛБООТОЙ ХАМТРАН АЖИЛЛАХ БОЛОМЖГҮЙ

Сирийн Засгийн газар нь Европын холбоотой аюулгүй байдлыг хангах чиглэлээр, түүн дотроо Европт байгаа сири дүрвэгчдийн дундаас алан хядагчдыг илрүүлэх талаар хамтран ажиллах боломжгүй гэсэн байна. Сирийн Ерөнхийлөгч Башар Асад "RT" сувагт ярилцлага өгөхдөө энэ тухай мэдэгджээ. Тэрээр "Одоогоор хамтын ажиллагаа гэж байхгүй байна, бид хамтарч ажиллахад бэлэн биш байна. Сирийн эсрэг эдийн засаг, аюулгүй байдал, улс төр гээд аливаа нэг чиглэлд үйл ажиллагаа явуулж байгаа улс орнуудтай аюулгүй байдлыг хангах салбарт тусламж үзүүлэх бодолгүй байгаа" гэжээ.

Сирийн иргэний дайн эхэлснээс хойш сая орчим Сири дүрвэгчид Европын холбоо руу дүрвэн гарсан гэж үздэг. Тэдний дундаа янз бүрийн алан хядах ажиллагаа хийсэн тохиолдолд олон бүртгэгдсэн. Үүний дээр Турк нь "Лалын улс" гэх мэт алан хядах байгууллагуудтай хамтран ажилласан гэж сэжиглэгдсэн хүмүүсийг өөрийн нутаг дээр хорихгүй, шууд иргэншлийнх нь дагуу албадан нутаг буцааж байхаар болсон тухайгаа мэдээлсэн нь байдлыг улам түгшүүртэй болгосон. Одоо Сирийн Засгийн газар, ОХУ, Туркийн армид ялагдан Сирийн нутаг дээр орогнох аргагүй болсон мянган мянган алан хядагчид харьцангуй тайван орнууд, түүний дотор Европын холбоог зүглэх болно гэсэн айдас явж байгаа юм.

Европын холбоо нь Сирийн хууль ёсны Засгийн газрын эсрэг эдийн засаг, улс төрийн маш хатуу хориг арга хэмжээ авсан бөгөөд Сирийн сөрөг хүчнийг зүйл бүрээр дэмждэг.