Хятадын хөрөнгө оруулалттай уурхайн ажилтны цогцос сарын дараа олджээ

Энэ сарын 7-ны өдөр Дундговь аймгийн Өндөршил сумын нутаг дахь Хятадын хөрөнгө оруулалттай уурхайд монгол иргэн амь насаа алдсан байна. Тодруулбал, жоншны ашиглалтын тусгай зөвшөөрөл эзэмшигч БНХАУ-ын хөрөнгө оруулалттай Эм Ди Эф И ХХК-ийн үйлдвэр барих ажил явагдаж байх үед тухайн газраас учир битүүлгээр амиа алдсан хүний цогцос олдсон байна. Талийгаач тухайн компанид ажиллаж байсан бөгөөд сар гаруйн дараа ийнхүү цогцос нь олдсон байна. Хэргийг Дундговь аймгийн цагдаагийн газарт шалгаж эхэлжээ. Тухайн уурхайг нутгийн иргэд анхнаасаа эсэргүүцсээр өнөөдөрт хүрсэн ч хүч хүрэлгүй үйл ажиллагаагаа явуулсаар байгаа бөгөөд тус уурхайд хятад иргэд олноороо ажилладгийг хэлж байна. Уурхайн хууль бус үйл ажиллагааг шалгуулахаар сумын ИТХ-аас аймгийн Мэргэжлийн хяналтын газарт гомдол гарган шалгуулахад "хуулийн хүрээнд бүх ажил явагдаж байгаа" гэсэн дүгнэлтийг ирүүлсэн байна. Харин үүнээс хойш удалгүй ийнхүү осол гарч, иргэн амиа алджээ.