​АНУ НЬ СЕРБИЙГ СҮРДҮҮЛЖЭЭ

АНУ-ын Төрийн департаментын тусгай төлөөлөгч Томас Зарзецки нь Серби улсыг ОХУ-ын батлан хамгаалах салбарын компаниудтай хамтран ажилласнаас нь болоод Вашингтоны зүгээс хориг арга хэмжээ авч магадгүй талаар Сербийн шадар сайд ба Гадаад харилцааны сайд Ивица Дачичд сануулжээ. Америкчууд "Америкийн дайснуудыг хориг арга хэмжээгээр эсэргүүцэх тухай" (CAATSA) хуулийг 2017 онд баталсан байдаг. Энэ хуулийн дагуу ОХУ, Иран, Хойд Солонгосын эсрэг ба эдгээр гурван улстай цэрэг техникийн салбарт хамтран ажиллаж байгаа гуравдагч орны эсрэг янз бүрийн хориг арга хэмжээ авах болсон. Тухайлбал, БНХАУ-ыг ОХУ-аас С-400 авлаа гэж зэвсэгт хүчнийх нь өндөр албан тушаалтнуудын эсрэг хориг арга хэмжээ авсан. Одоо Туркийг мөн л С-400 авлаа гэж хориг арга хэмжээ авах гэж байна. Энэтхэгийг С-400 авбал хориг арга хэмжээ авна гэж анхааруулан сүрдүүлээд байгаа. Харин одоо ийнхүү Сербийг анхааруулан сүрдүүлж, Оросоос байлдааны техник худалдан авахаа зогсоохыг шаардаж байна.

Учир нь, аравдугаар сарын сүүлээр Орос ба Сербийн хамтарсан "Славчуудын бамбай" хээрийн сургууль дууссаны дараагаар Ерөнхийлөгч Александр Вучич нь Оросоос зенитийн пуужингийн "Панцирь-С" төхөөрөмж худалдан авах тухайгаа албан ёсоор мэдэгдсэн юм. Үүнээс өмнө Серб нь ОХУ-аас Ми-17, Ми-35 нисдэг тэрэг долоон ширхгийг худалдаж авсан бол Орос нь тусламж болгож зургаан ширхэг МиГ-29 сөнөөгч онгоц, 10 ширхэг "БРДМ-2МС" хуягт бэлэглэсэн. Мөн БНХАУ нь Сербид багагүй тооны байлдааны техник, тоног төхөөрөмж бэлэглэж байсан. Товчхон хэлбэл Серби нь АНУ-ын гол хоёр дайснаас байлдааны техник зэвсэг аваад байгаа нь тун ч таалагдахгүй байгаа бололтой.

Сербийн Гадаад хэргийн яам нь АНУ-ын Төрийн департаментын тусгай төлөөлөгчийн айлчлалын талаар "Томас Зарзецки нь Бүгд найрамдах Серби улсын холбогдох байгууллагуудыг тусгайлан "АНУ-ын дайснуудыг хориг арга хэмжээгээр эсэргүүцэх тухай" хуультай танилцуулах, түүн дотроо ОХУ-ын аюулгүй байдал тагнуулын салбартай хамтран ажилладаг хуулийн этгээд ба хувь хүмүүсийн эсрэг АНУ-ын зүгээс хориг арга хэмжээ авах боломжийг дурдсан тус хуулийн 231 зүйлтэй танилцуулах зорилгоор хүрэлцэн ирсэн. Зарзецки нь Сербид ирэхээсээ өмнө адил зорилгоор өөр 60 улсад айлчлаад ирсэн" гэсэн мэдэгдэл гаргасан байна.