​АМЕРИКЧУУД ХЯТАД КОМПАНИУДЫН БОЛОВСРУУЛСАН АПП ХУДАЛДАН АВАХАД 745 САЯ ДОЛЛАР ЗАРЦУУЛЖЭЭ

Хятадын компаниудын боловсруулсан ухаалаг утасны аппликейшныг худалдан авахад АНУ-ын иргэд 2019 оны гуравдугаар улиралд 745 сая доллар зарцуулсан тухай "CNBC" мэдээлсэн байна. Энэхүү тоог "Sensor Tower" компани тусгайлан хийсэн судалгаагаар тогтоосон аж. АНУ-ын иргэд ухаалан утасны аппликейшн худалдана авахад нийтдээ 3,43 тэрбум доллар зарцуулснаас 22 хувийг нь Хятадын апп боловсруулагчдад ногдсон байна. Ингээд зогсохгүй сүүлийн үед Хятадын компаниудын боловсруулсан аппликейшныг худалдан авах нь илэрхий нэмэгдэх болсон хандлагыг судлаачид олж тогтоожээ. Тухайлбал, 2018 оны гуравдугаар улиралд АНУ-д хамгийн түгээмэл 100 аппликейшны 21 нь Хятадынх байсан бол 2019 оны мөн үеийн байдлаар энэ тоо 25 болж нэмэгдсэн байна.

Хятадын компаниудын боловсруулсан программ хангамж, аппликейшнууд аюулгүй байдалд нь заналхийлж байж магадгүй тухай АНУ-ын Засгийн газрын болгоомжлол түгшүүрийг жирийн иргэд нь огт тоохгүй байгаагаас ийм байдал үүсэж байгаа гэдгийг "Kantan Games" консалтингийн компанийн захирал Серкан Тото онцолсон байна. Тэрээр "Минийхээр бол АНУ-ыг хэрэглэгчдийн дийлэнх нь эдгээр аппликейшныг Хятадын компаниуд хийсэн талаар ямар ч төсөөлөөлгүй яваа байх. Жирийн хэрэглэгч иймэрхүү зүйлд огт санаа зовохгүй" гэжээ.

Харин АНУ-ын Засгийн газар энэ талаар маш их санаа зовж, янз бүрийн арга хэмжээ авсаар байгаа аж. Жишээлбэл, өнгөрсөн аравдугаар сард АНУ-ын сенатч Чак Шумер, Том Коттон нар нь "TikTok" олон нийтийн сүлжээг эзэмшдэг Хятадын "ByteDance Technology" компанийг шалгах хүсэлтийг АНУ-ын үндэсний тагнуулын албанд гаргасан. Энэхүү сүлжээний хэрэглэгч Америк иргэдийн талаарх мэдээллийг АНУ-аас өөр газар байрлах серверүүд дээр хадгалах замаар Америкийн хууль журмыг зөрчиж байж магадгүй тул ийм хүсэл гаргасан гэж байсан.

Түүнчлэн, АНУ-ын Гадаадын хөрөнгө оруулалтын хороо (CFIUS) нь арваннэгдүгээр сарын 1-ээс Хятадын "ByteDance Technology" компани Америкийн "Musical. ly" сервисийг худалдан авсан явдал хууль журамд нийцэх эсэхийг шалгаж эхэлсэн байгаа аж.