Д.ОДБАЯРЫГ БАРИВЧЛАН ТУСГААРЛАН ХОРЬЖЭЭ

Үндсэн хуулийн цэцийн дарга Д.Одбаярыг өнөө өглөө БНСУ-д дамжин өнгөрөхөөр буух үед нь цагдаагийн байгууллагаас шууд баривчилсан байна. Тодруулбал, онгоцны үйлчлэгчийн биед хүрч бэлгийн дарамт үзүүлсэн хэрэг, мөн орчуулагч эмэгтэйг заналхийлсэн нэмэлт хэргээр баривчилсан бөгөөд тусгаарлан хорьсон байна.

Хэргийг сануулбал, Монгол Улсын Үндсэн хуулийн Цэцийн дарга Д.Одбаяр болон түүнийг дагалдан явсан А нар аравдугаар сарын 31-ний өдөр онгоцны үйлчлэгчийн биед хүрсэн буюу бэлгийн халдлага үйлдсэн хэргээр Өмнөд Солонгосын цагдаад саатуулагдсан байдаг. Түүнийг Улаанбаатар-Сөүл чиглэлийн онгоцоор зорчиж явахдаа онгоцны үйлчлэгч болох 20 настай эмэгтэйн биед хүрсэн, мөн А гэгч монгол иргэн үйлчлэгчийг мөрөөр нь тэвэрсэн үйлдэл гаргасныг буруутгаж, тус улсын цагдаагийн алба хаагчид саатуулсан талаар Өмнөд Солонгосын хэвлэлүүд анх мэдээлсэн юм.

Өмнөд Солонгосын хэвлэлүүдийн мэдээлснээр тухайн өдөр Үндсэн хуулийн цэцийн дарга Д.Одбаяраас цаг гаруй хугацаанд байцаалт авчээ. Тухайн үед Д.Одбаяр нь "Би энэ явдалд хамаагүй. Миний ард сууж явсан хүнтэй холбоотой. Намайг андуурсан" хэмээн мэдүүлээд, асуудлыг дипломат халдашгүй эрхийн хүрээнд шийдэхийг хүссэн байдаг. Улмаар БНСУ-д эргэж ирээд мэдүүлэг өгөхөө илэрхийлж, Бали аралд болох Олон улсын хуралд оролцохоор явсан юм.

Өмнөд Солонгосын тал арваннэгдүгээр сарын 1-нд түүнийг Индонез руу нисэхийг нь зөвшөөрч, цааш явуулсан ба БНСУ-д эргэж ирэхгүй тохиолдолд ямар ч мөрдөн байцаалт явуулалгүйгээр хэргийг прокурорт шилжүүлэхээ мэдэгдсэн байна.

"Корейн Эйр" компанийн зүгээс "Нисэх онгоцны үйлчлэгчээр ажилладаг Монгол Улсын иргэн эмэгтэйг Монгол Улсын Үндсэн хуулийн Цэцийн дарга Д.Одбаяр монгол хэлээр доромжилсон, сүрдүүлсэн нь түүнийг сэтгэл зүйн тогтворгүй байдалд хүргэсэн" хэмээн мэдээлэл өгчээ. Яг юу гэж сүрдүүлснийг нь олон нийтэд тодорхой мэдээлээгүй байгаа хэдий ч тухайн үеийн байдлаас болж их хэмжээний айдастай, чичирч байсан талаар мэдээлэл өгөв. Цагдаагаас тухайн ажилтныг мөн мэдүүлэг өгүүлэхээр дуудсан байна.