ХЭЛЛОУИНЫ БАЯРААР ГИТЛЕРИЙН ХУВЦАС ӨМСӨЖ ИРЭЭД БАГШАА АЖИЛГҮЙ БОЛГОЖЭЭ

Хэллоуины баяраар элдэв үлгэрийн баатар, киноны дүр, түүхэн хүмүүсийн хувцсыг өмсөж, нүүрээ хувиргадаг уламжлалтай. Үүнээс болж янз бүрийн ээдрээ үүсэх нь цөөнгүй. Жишээлбэл, энэ жилийн Хэллоуины баяраар Америкийн Юта мужийн Криксайд хотын бага сургуулийн сурагч АдольфГитлерийн хувцсыг өмсөж ирсэн явдал ихээхэн дуулиан тарьжээ. "Deseret News" сонины мэдээлж байгаагаар Гитлерийн дүрэмт хувцас өмссөн жаал хүү үндэсний цөөнхийн төлөөлөл болсон хүүхдүүдийн өмнө нацист байдлаар ёсолж байгааг харуулсан фото зураг олон нийтийн сүлжээгээр тархсаны дараа бөөн шуугиан дэгджээ. Юта мужийн еврейчүүдийн холбоо нь жаал хүүг тийм хувцас өмссөнийг эрс шүүмжлээд цаашдаа ахин ийм байдал гаргуулахгүй байх талаар хүүгийн эцэг эх, сургуулийн захиргаа анхаарах ёстой гэж мэдэгдсэн байна.

50 сая хүний аминд хүрсэн аймшигт дайн, хүнийг яс үндсээр нь үзэн яддаг бурангуй үзлийг үүсгэн байгуулагчийг бага сургуулийн жаал хүү яагаад дуурайх болсон талаар мөрдөн байцаалт явуулж шалгахаар болжээ. Шалгалт хийх хугацаанд хүүгийн ангийн багш ба сургуулийн захирлыг цалинтай амралтад албадан гаргаад байгаа юм байна.