ЭНЭТХЭГИЙН ЖАММУ БА КАШМИРЫН ЗАХ ДЭЭР ГРАНАТ ДЭЛБЭРЧ ОЛОН ХҮН ШАРХАДЖЭЭ

Энэтхэгийн Жамму ба Кашмир холбоот газар нутгийн зах дээр алан хядагчид гранат дэлбэлсний улмаас нэг хүн амиа алдаж, 18 хүн шархадсан тухай нутгийн цагдаагийн алба мэдээлжээ. Сринагар хотын зах зах дээр арваннэгдүгээр сарын 4-ний өдөр дэлбэрэлт болсон байна. Шархадсан хүмүүсийг эмнэлэгт хүргэж, хэргийн газар ирсэн цагдаа нар мөрдөн байцаах ажил явуулж байгаа юм байна. Одоогоор Жамму ба Кашмирт үйл ажиллагаа явуулдаг хэт даврагч бүлэглэлүүдээс нэг нь ч тус дэлбэрэлтийн хариуцлагыг хүлээх тухай мэдээлээгүй байна.

Энэтхэгийн Засгийн газар Жамму ба Кашмир онцгой эрхтэй муж байсныг татан буулгаж, Жамму ба Кашмир болон Ладхак гэсэн холбоот газар нутаг гэсэн шинэ субъект хоёрыг бий болгох тухай шийдвэр нь аравдугаар сарын 31-ний шөнө дундаас хэрэгжиж эхэлсэн. Өмнө нь муж байхдаа Жамму ба Кашмир нь тусдаа үндсэн хуультай, өөрсдийн бүрдүүлдэг Засгийн газартай, өргөн хүрээ бүхий автономит эрхтэй байсан. Шинэ шийдвэр хүчин төгөлдөр болсноор холбоот газар нутаг нь Энэтхэгийн төв Засгийн газрын шууд захиргаанд байдаг, хууль тогтоох хуралгүй болсон юм. Энэ шийдвэрийг Жамму ба Кашмир мужийг Энэтхэгээс салан тусгаарлахын төлөө үйл ажиллагаа явуулдаг олон тооны бүлэглэл, тэдгээрийг дэмждэг Пакистан зэрэг улсууд тун таагүй хүлээн авч, хурцаар шүүмжилсэн.