ИЗРАЙЛЫН ЗАСГИЙН ГАЗАР ГУРАВ ХОНОГИЙН ДОТОР ПАЛЕСТИНЫ ГАЗАР НУТГИЙГ ХУРААН АВАХ 16 ТОГТООЛ ГАРГАЖЭЭ

Израйлын Засгийн газар нь Иордан голын баруун эрэг дагуух Палестины эзлэгдсэн газар нутгаас хураан авах 16 тогтоол шийдвэрийг сүүлийн гурав хоногийн дотор гаргасан тухай "Anadolu Ajansi" агентлаг мэдээлж байна. Энэхүү үйлдэлд "Еврейчүүдийн хууль бус сууриныг эсэргүүцэх хороо"-ны тэргүүн ВалидАссаф нь "Булаан авах тогтоол нь аль хэдийн болж өнгөрсөн зүйлийг албан ёсоор бүртгэж байгаа төдий юм" гэсэн тайлбар өгчээ. Израйлын эрх баригчид хууль бусаар булаан авсан газар нутгийг хуулийн дагуу хийгдсэн болгож харагдуулснаар эдгээр нутгийн газрын хэвийн баялгийг бүрэн хяналтдаа оруулахыг зорьж байна гэж Ассаф үзэж байгаа юм байна.

1967 оны "Зургаан хоногийн дайн"-ы дараа Израйл нь Иордан голын Баруун эрэг дээрх Палестины нутгийг булаан эзэлсэн байдаг. Гэвч энэхүү үйлдлийг нь дэлхийн нийт хүлээн зөвшөөрөөгүй бөгөөд одоо ч Палестин улсын газар нутаг гэж үзсэн хэвээр байна. Израйлын эрх баригчдын хийсэн энэхүү үйлдлийн дараа Европын холбооны удирдлагаас Израйлд хандан булаан эзэлсэн газар дээр еврейчүүдийн суурин барих ажлаа зогсоохыг уриалсан байна. Арванэгдүгээр сарын 4-нд Европын холбооны төлөөлөгчдийн хийсэн мэдэгдэлд "Европын холбоо нь Израйл улсыг булаан эзэлсэн газар нутаг руу хүн ам шилжүүлэн суурьшуулахтай холбоотой бүх ажлаа зогсоохыг уриалж байна" гэжээ. Түүнчлэн Европын холбооны удирдлага нь Тель-Авивын хийж байгаа үйлдэл нь олон улсын хэм хэмжээг зөрчиж байна гэсэн байр сууринд хэвээр гэдгээ онцолжээ.

Одоогоор Иордан голын Баруун эрэг дагуух булаан эзлэгдсэн нутаг дээр 650 мянган еврей шилжин суурьшигчид амьдарч багаа юм.