ЯПОНЫ ХУУЛЬ ЗҮЙН САЙД ОГЦОРЛОО

Японы Ерөнхий сайд Синзо Абэ энэ долоо хоногт хоёр дахь удаагаа сайд нь огцорч байгаад ард түмнээсээ уучлал гуйсан тухай "NHK" мэдээлж байна. Хэдхэн хоногийн өмнө Эдийн засаг, худалдаа ба аж үйлдвэрлэлийн сайд Иссю Сугавара нь сонгогчдодоо хулуу, жимс үнэгүй тараасан, нэг дэмжигчийнхээ гэр бүлд 20 мянган йень бэлнээр өгсөн дуулианаас болж өөрийн хүсэлтээр суудлаасаа буусан. Тэгвэл энэ удаад Хууль зүйн сайд Кауюки Каваи нь мөн адил хэргийн улмаас албан тушаалаасаа огцорсон байна. Сайдын эхнэр Анри Каваи нь сонгуулийн штабын ажилтнууддаа хууль зөрчин хоёр дахин өндөр цалин өгдөг, түүнчлэн өөрийн тойргийн оршин суугчдад жимс бэлэглэсэн гэдгийг "Shukan Bunshun" сэтгүүлд баримттайгаар илчилсний дараа сайд арга буюу огцорчээ. Уг нь Хууль зүйн сайдынхаа эрх мэдлээрээ далайлгаад суудалдаа үлдэж чадах байсан ч Япон нь Азийн зарим улс орноо хавьгүй илүү ёс зүйтэй тул ийнхүү огцорсон бололтой. Ташрамд сонирхуулахад, өмнөх сайдыг огцроход хүргэсэн баримтуудыг мөн л "Shukan Bunshun" сэтгүүлийн олон нийтэд ил болгосон байжээ.