​РУМЫНЧУУД ОХУ-ААС 93 ТОНН АЛТ НЭХЖЭЭ

Европын холбооны парламентад Румынаас сонгогдсон гишүүд Европын зөвлөлийн Парламентын ассамблейгаас Оросын талаар гаргах тогтоолын бичвэрт Хаант Орост хадгалуулахаар өгсөн Румыны вант улсын алтыг буцаан өгөх тухай заалтыг нэмэлт өөрчлөлт болгон оруулах санал гаргажээ. Румыны гишүүдийн санаагаар ОХУ нь эхний ээлжид хадгалуулахаар өгсөн Румыны алтны нөөц болох 93,4 тонныг буцаан өгөх ёстой юм байна.

Энэ ээдрээ бүр 1916 онд эхэлсэн түүхтэй аж. 1916 наймдугаар сард Румыны вант улс Дэлхийн нэгдүгээр дайнд Антантын талд орсны хариуд Германы цэргүүд газар нутгийг нь бүрэн эзлэх нь гарцаагүй болоход тэр жилийнхээ арванхоёрдугаар сард алтны нөөцөө хадгалуулахаар Оросын эзэнт гүрэн рүү зөөсөн аж. 1918 онд Дэлхийн нэгдүгээр дайн дууссан ч Орост Октябрийн хувьсгал гарч суларч доройтсон байсан тул румынчууд хуучин Хаант Оросын мэдэлд байсан Бессараб мужийг нь байлдан эзэлжээ. Хариуд нь большевикууд алтны нөөцөө эргүүлж авахын тулд Бессараб нутгийг чөлөөлөхийг шаардсан байна. Ингэж байтал 1940 онд Молотов-Риббентропын гэрээ ёсоор Зөвлөлт нь Бессараб мужаа эргүүлэн авч Молдовын бүгд найрамдах улс нэртэйгээр нэгтгэсэн. Гэтэл жилийн дараа Зөвлөлт Герман хоёр дайтахад Румын нь Гитлерийн талд байлдан Зөвлөлтийн асар өргөн уудам газрыг, одоогийн Молдов, Украйны Одесса хот, Крымийн хойг хүртэл эзэлж асар их баялгийг нь зөөж гарган, олон зуун мянган иргэнийх нь амийг бүрэлгэсэн.

Дайнд Зөвлөлт ялсны дараа 1947 онд байгуулсан Парисын энхийн гэрээ ёсоор Румын нь ЗХУ-д дайнд учруулсан хохирлын нөхөн төлбөр гэж 300 сая доллар төлөх ёстой болсон. Зарим судлаач энэ мөнгийг Румыны учруулсан хохирлын ердөө 1/5 –тай тэнцэх хэсэг гэж үздэг. Гэтэл 1947 онд Румынд коммунистууд ялж социалист улс болсны дараа Зөвлөлт нь холбоотон улсаас нөхөн төлбөр авахгүй гэж бүх өрийг тэглэсэн бол 1956 онд Хрущев нь Зөвлөлтийг удирдаж байхдаа Румыны алтны нөөцийн зарим хэсгийг сайн санааны илрэл болгон буцаан өгч байжээ.

Цаашдаа Румын ба Зөвлөлт хоорондын харилцаа эрс муудсан зэргээс болж энэ асуудлыг ер сөхөхгүй болсон. Зөвлөлтийг задран унасны дараа нэг хэсэг яригдаж байгаад мартагдсан ч одоо ийнхүү ахин сөхөгдөж байгаа бололтой. ОХУ-ын Гадаад яамны төлөөлөгч Румыны депутатуудын санаачилгын талаар тайлбар өгөхдөө "..Одоогоор Орос ба Румыны улс төрийн харилцан ярианд "румыны алт" гэсэн сэдэв байхгүй. Орчин үеийн нөхцөлд өнгөрснийг ухаж төнхөн сэргээх нь сөрөг үр дагавартай бөгөөд хоёр талын хамтын ажиллагааны үнэнхүү чухал асуудлын шийдлээс анхаарлыг сатааруулан огт хэрэггүй сэтгэл хөдлөлийг хөөргөдөхөөс цаашгүй гэж бид үзэж байна" гэжээ.