​ТАЖИКИСТАНЫ ЗАМ ЗАСВАРТ ЗОРИУЛАН ХЯТАДЫН ЗАСГИЙН ГАЗАР 2,5 ТЭРБУМ ЮАНИЙН БУЦАЛТГҮЙ ТУСЛАМЖ ҮЗҮҮЛНЭ

БНХАУ-ын Засгийн газраас Тажикистан улсад 357 сая гаруй долларын ээлжит удаагийн буцалтгүй тусламж үзүүлэхээр боллоо. Энэ мөнгийг Куляб ба Бохтар хотууд доторх авто замыг сэргээх, Душанбэ –Кульма чиглэлийн авто замыг сайжруулан шинэчлэхэд зарцуулахаар болж байгаа тухай "Avesta" агентлаг мэдээлсэн байна. Тажикистаны парламентын доод танхим болох Мажлиси намояндагон нь Хятадаас 2,5 тэрбум юанийн буцалтгүй тусламж хүлээн авах тухай тохиролцоог аравдугаар сарын 30-нд баталсан байна. Буцалтгүй тусламжийг хүлээн авах баримтыг парламентын доод танхимд өргөн барьсан Тажикистаны Эдийн засгийн хөгжил ба худалдааны сайд Негматулло Хикматуллозода нь хоёр орны хооронд байгуулсан 2018-2020 онуудад техник эдийн засгийн салбарт хамтран ажиллах гэрээний хүрээнд Хятадын Засгийн газар энэ хөрөнгийг гаргаж өгч байгааг онцолжээ.