ТОЛГОЙЛОГЧОО БАРЬЖ ӨГСӨН МЭДЭЭЛЭГЧИД 25 САЯ ДОЛЛАР ӨГНӨ

"Лалын улс" алан хядах байгууллагын толгойлогч Абу Бакр аль-Багдадийг устгахад шийдвэрлэх ач холбогдолтой мэдээлэл өгсөн мэдээлэгч, аль Багдадийн туслах асан хүнд Америк 25 сая долларын урамшуулал олгож магадгүй тухай "The Washington Post" сонин мэдээлсэн байна.

Тус сонины мэдээлж буйгаар мэдээлэгч нь аль-Багдадийн бүх шилжилт хөдөлгөөний талаар Америкийн тусгай албадад цаг тухайд нь мэдээлж байсан төдийгүй Идлиб муж дахь маш нууц хорогдох байрыг нь барихад гардан тусалж байсан хүн юм байна. Тэрээр алан хядагчдын толгойлогчийн орогнож байгаа нуувчны дэлгэрэнгүй төлөвлөгөө зургийг гаргаж өгсөн нь дайралт хийх үед амин чухал үүрэг гүйцэтгэсэн аж.

Аль-Багдадийг устгах ажиллагаа амжилттай болж дууссанаас хоёр хоногийн дараа мэдээлэгчийг гэр бүлийн хамтаар аюулгүй газар руу нүүлгэн шилжүүлсэн юм байна. Түүнд амласан ёсоор 25 сая долларыг бүхлээр нь эсвэл тодорхой хэсгийг нь өгч магадгүй гэж байна. Уг нь бол АНУ-ын Засгийн газар аль-Багдадийн талаар баталгаатай мэдээлэл өгсөн хүнд 25 сая доллар амласан байгаа.

"The Washington Post" сонины нэгэн эх сурвалжийн мэдээлж байгаагаар мэдээлэгч нь хамаатынхаа үхлийн төлөө цусан өшөө авахыг хүсэж байсан суннаг дагагч араб хүн байж. Тэрээр өс авах боломж хайж явахдаа "Сирийн ардчилсан хүч" бүлэглэлийн курдуудтай сэм холбоо тогтоогоод байсныг америкчуудад мэдээлэн холбож өгсөн юм байна.