​ГЕРМАНЫ 600 ТОНН ЦӨМИЙН ХАЯГДЛЫГ ОРОСТ ХҮРГЭХ ГАЛТ ТЭРЭГ ХӨДӨЛЖЭЭ

Гэрээний дагуу 600 тонн цацраг идэвхт цөмийн хаягдлыг Орост хүргэх галт тэрэг Германы Гронау хотоос аравдугаар сарын 28-нд хөдөлсөн тухай "DW" агентлаг мэдээлж байна. Цөмийн хаягдал ачсан галт тэргийг Нидерландын Амстердам хот дахь усан боомт хүргэж, тэндээсээ далайн тээврээр Орост хүргэх аж. Цацраг идэвхт хаягдлыг тээвэрлэж байгаа "Urenco Deutschland" компанийн мэдэгдэж байгаагаар 2019 он дуустал Германаас 6000 тонн буюу 725 контейнерийг Орос руу хүргэх ёстой. Одоогийн байдлаар тус бүр нь 600 тонны татах долоон багцыг явуулаад байгаа юм байна. Германаас явуулж байгаа цацраг идэвхт хаягдлыг Оросын "Tenex" компани хүлээн аваад дахин баяжуулаад буцаан явуулдаг юм байна. Ингэж ахин баяжуулсан уранаар "Urenco" компани нь дэлхий даяар цөмийн цахилгаан станцуудад зориулагдсан түлш үйлдвэрлэн бэлддэг аж. Бага агуулгатай ураны гексафторидыг ингэж дахин баяжуулж ашигласнаар байгалийн ураны олборлолтыг 20 хувиар багасгах боломжтой болдог гэж мэргэжилтнүүд хэлсэн байна. Хаягдал ураныг 16 мм-ийн гангаар хийсэн контейнерт хийж тээвэрлэдэг бөгөөд энэ контейнер нь 28 бар даралт, агаарын температурын огцом хэлбэлзэл, ил гал зэрэгт тэсвэртэй байхаар хийгдсэн байдаг аж. ХБНГУ нь цөмийн эрчим хүчнээс татгалзахаар шийдээд цөмийн түлшээр ажилладаг бүх станцуудаа хаах бодлого хэрэгжүүлж байгаа. Германы 17 цөмийн цахилгаан станц 1960 оноос хойш 12 мянга 500 тонн өндөр идэвхтэй цацраг идэвхт хаягдал гаргасан байдаг юм байна.