​ӨМНӨД АФРИКТ ЦЭВЭР УСНЫ ХЭРЭГЛЭЭНД ХЯЗГААРЛАЛТ ТОГТООЖЭЭ

Өмнөд Африкийн Бүгд Найрамдах улсад хэт халуун, хуурай зуны дараа хэрэглээ эрс нэмэгдэн, дунджаас бага хур тунадас орсонтой холбоотойгоор цэвэр усны хэрэглээнд хязгаарлалтын онцгой горим тогтоож байгаа тухай "Reuters" агентлаг мэдээлж байна. Тус улсын Усан хангамж ба ариун цэврийн департаментын мэдээгээр орон даяар усан далан дахь усны хэмжээ 2018 оныхоос 10-аас 60 хувь хүртэл хэмжээнд хүрч багасжээ. Хязгаарлалтын онцгой байдал зарлан хэрэглээг хүчээр багасгаагүй тохиолдолд дамжуулах шугам сүлжээнд ус огт байхгүй болох "тэг өдөр" гээч зүйл үүсэх хэмжээнд хүрсэн гэж байна. Өмнөд Африкийн Тосгон суурин, ус хангамж ба ариун цэврийн сайд Линдиве Сисулу "Тэг өдөр гээч аймшигтай үзэгдлээс зайлсхийхийн тулд шаардлагатай бүхнийг хийж байгаа бөгөөд үүний тулд ус ашиглахад хязгаарлалт тогтоолоо. Хур тунадас орох загварыг урьдчилан тооцоолох нь улам бүр хэцүү болж байгааг бид харж байна. Дэлхийн бусад газартай адилаар эндэхийн хуурай улирал илүү урт, ширүүн, эрчимтэй болж өнгөрдөг болж байна. Цаг агаарын өөрчлөлт бодит байдал болоод ӨАБНУ-д хүрээд байна" гэжээ. ӨАБНУ нь усны нөөцийн хамгийн их дутагдалтай 30 орны тоонд багтдаг. 2015 онд Эль Ниньо циклоноос үүдэлтэй ган гачиг дайрсны улмаас энэ улсын усан хангамж бүр ч таагүй байдалд орсон. Одоогийн байдлаар Өмнөд Африкийн зүүн мужууд сүүлийн зуун жил байгаагүй хүчтэй ган гачигт нэрвэгдээд байгаа. Үүнээс болоод Йоханнесбург гэх мэт төв хэсгийн хотууд ч усны хэрэглээд хязгаарлалт тогтоож эхэлжээ.