КАЛИФОРНИД ТҮЙМРИЙН УЛМААС 50 МЯНГА ХҮНИЙГ НҮҮЛГЭН ШИЛЖҮҮЛНЭ

АНУ-ын Калифорни мужид дэгдсэн түймрийн улмаас эрх баригчид 50 мянган хүнийг аюулгүй газар руу нүүлгэн шилжүүлэхээр болсон тухай "Associated Press" агентлаг мэдээлж байна. Түүнчлэн энэ түймрийн үеэр салхины хурд огцом ширүүсэх төлөвтэй холбогдуулан 2,35 сая оршин суугчдыг цахилгаанаас түр салгахаар болсон байна. Цаг агаарын шинжээчид түймэртэй бүс нутагт салхины хурд 120 км/ц хүрнэ гэж анхааруулсан байна.

2018 оны арваннэгдүгээр сард Калифорни мужийн хойд хэсэгт болсон аймшигт түймрийн үеэр 85 хүн амь үрэгдэж, 14 мянган орон сууц шатаж, 520 арилжааны байгууламж, 4000 гаруй бусад барилга байгууламж шатсан. Тухайн үед түймэр 620 кв.км талбайг хамарч байлаа.

Энэ аймшигт түймэр нь "Pacific Gas and Electric" компанийн цахилгаан дамжуулах шугам сүлжээнд гарсан ажлын доголдлын улмаас гарсан болохыг мөрдөн байцаалтын явцад тогтоосон байдаг. Улмаар "Pacific Gas and Electric" компанийг 1 тэрбум доллароор торгосон юм. Үүнээс хойш тус мужид цахилгаан дамжуулалт гүйцэтгэдэг компани нь түймрээс урьдчилан сэргийлэх үүднээс хүчтэй шуурганы үеэр цахилгаан дамжуулалтыг түр таслах арга хэмжээ авдаг болжээ.

Жишээлэхэд, энэ сарын 8-нд хүчтэй шуурганы өмнө 850 мянган хэрэглэгчийн цахилгааныг түр тасалж байсан юм.