Н.БАЯРТСАЙХАН: АСАР ДУУЛИАНТАЙГААР ХЭРГИЙГ ШАЛГАЖ ЭХЭЛДЭГ, ГЭХДЭЭ ШИЙДДЭГГҮЙ

УИХ-ын Эдийн засгийн байнгын хорооны хурал эхэллээ. Уг хуралдаанаар 2020 оны төсөв, мөнгөний бодлогыг хэлэлцэх аж. Хуралдааны эхэнд Монгол банкны Ерөнхийлөгч Н.Баяртсайхан илтгэл тавьсан бөгөөд мөнгө угаах гэмт хэргийг хуулийн байгууллагаар шийдүүлэхгүйгээр саарал жагсаалтаас гарах боломж хомс гэж үзэв.

С.Чинзориг: Саарал жагсаалтад орсноор эдийн засгийн ямар хориг хэмжээнүүд авагдах вэ? Саарал жагсаалтад ороход арилжааны банкуудтай холбоотой асуудал нөлөөлсөн үү?

Н.Баяртсайхан: Бид хар жагсаалтад орохгүйн тулд саарал жагсаалтад орсон. С.Чинзориг сайдаа, энэ бол зөвхөн Монголбанкны ажил бишээ. Засгийн газар ч ажиллах ёстой байсан. Ялангуяа асар дуулиантайгаар хэргүүдийг шалгаж эхэлдэг. Гэхдээ шүүх дээр хэрэг нь шийдэгддэггүй, энэ нь саарал жагсаалтад ороход нөлөөлөл үзүүлсэн. Арилжааны банкуудын асуудал саарал жагсаалтад ороход нөлөөлөөгүй ээ.