ХЯТАД УЛС БАЯН ХҮНИЙ ТООГООР АМЕРИКААС ТЭРГҮҮЛЛЭЭ

БНХАУ нь хамгийн баян гэсэн давхаргад багтдаг хүмүүсийнхээ тоогоор АНУ-ыг анх удаа давж гарсан тухай "Credit Suisse" банкнаас бэлдсэн дэлхийн эд баялгийн тархалт, төлөв байдлын тухай жил тутмын илтгэлд өгүүлсэн байна. Тодруулбал, дэлхийн хүн амын 10 хувийг эзэлдэг хамгийн баян хүмүүсийн тоонд багтдаг хятад иргэдийн тоо 99,9 сая болсон. Харин Америкт энэ хамгийн баян 10 хувьд багтдаг хүний тоо 98,9 сая болоод байгаа аж. Гэхдээ Америк нь саятнуудынхаа тоогоор Хятадаас илүү хэвээр байна. Америкийн саятнуудын тоо 18,6 саяд хүрсэн бол Хятадын саятнуудын тоо 4,4 сая болсон байна.

Мөн Америк нь сүүлийн нэг жилийн дотор 3,8 их наяд долларын хуримтлал үүсгэсэн бол Хятад 1,9 их наяд долларын хураажээ.

Дэлхийн хэмжээнд америк долларын саятнуудын тоо 1,1 саяар нэмэгдэж 47 саяд хүрсэн бөгөөд тэдний нийт хөрөнгийн хэмжээ 158,3 их наяд доллар болсон нь дэлхийн баялгийн 44 хувь болжээ.