БОРИС ЖОНСОН BREXIT-ИЙН АЧ ТУСЫГ ТАЙЛБАРЛАВ

Их Британи нь Европын холбоотой Brexit-ийн талаарх шинэ тохиролцоонд хүрч чадсан байна. Улмаар Их Британийн Ерөнхий сайд Борис Жонсон Twitter хуудсаараа Brexit-ийн талаар Европын холбоотой байгуулсан шинэ тохиролцооны давуу талыг тайлбарлажээ. Тэрээр "Европын холбоотой чөлөөт худалдаа ба найрсан хамтын ажиллагааны үндсэн дээр тулгуурласан шинэ харилцааг тогтооно гэсэн баталгааг шинэ тохиролцоо нь өгч байгаа бөгөөд бид өөрсдийн хууль, хил, санхүү, худалдааны харилцаагаа өөрсдөө мэдэн хянадаг, хэн ч бидэнд саад болохгүй байхаар боллоо" гэсэн байна.

Brexit-ийг тохиролцоонд хүрэхэд хамгийн их саад болж байсан Умард Ирландын асуудал буюу "бэкстоп" -ын асуудлыг шинэ тохиролцоогоор шийдэж чадсан байна. ТерезаМэй нь энэхүү "бэкстоп"-ын асуудлыг шийдэж чадаагүйн улмаас Ерөнхий сайдын судлаасаа огцорч байсан юм. "Бэкстоп" нь Ирландын бүгд найрамдах улс гэдэг Европын холбооны гишүүн улс ба Их Британийн бүрэлдэхүүнд багтдаг Умард Ирланд гэсэн хэсэг хоорондын хилийн асуудал юм. Өмнөх нөхцөл ёсоор Их Британи нь Умард Ирландын эдийн засгийн удирдлага, хяналтыг Европын холбоонд үлдээхээр байсан юм. Борис Жонсон энэ талаар "Түүнчлэн шинэ тохиролцоо нь хэрэв ард түмэн хүсвэл Умард Ирландад зориулан гаргасан онцгой журмыг халах боломжийг ард түмэнд олгож байгаа юм" гэжээ.

Гэхдээ Борис Жонсоны Засгийн газар Европын холбоотой удирдлагатай тохиролцсон нь зөвхөн эхний алхам. Одоо энэ тохиролцоог нь Их Британийн парламент баталгаажуулах ёстой. Парламент баталгаажуулаагүй тохиолдолд Борис Жонсон нь Brexit-ийг ахин гурван сар ухраах хүсэлтийг Европын холбоонд гаргахаас өөр аргагүй болох юм. Гэтэл парламент дахь Борис Жонсоныг дэмжигчдийн тоо нь ТерезаМэйг дэмжигчдээс ч цөөн тул байдал ээдрээтэй хэвээр байгааг шинжээчид онцолжээ.