​АМЕРИКИЙН КОМПАНИУД АШИГ ХӨӨЦӨЛДӨН ХЯТАДЫН ЭРХ БАРИГЧДАД ЗУСАРДАЖ БАЙГАА ЮУ

Филиппиний Гадаад хэргийн сайд Теодоро Локсин нь Америкийн "Dreamworks" студийн бүтээсэн "Эверест" анимац кинонд "бойкот" зарлахыг эх орон нэгтнүүддээ уриалсан тухай "Reuters" агентлаг мэдээлж байна. Гэр бүлээр үзэхэд зориулагдсан тус анимац кинон дээр Өмнөд Хятадын тэнгис дэх Филиппин өөрийн гэж үздэг маргаантай арлуудыг БНХАУ-ын газар нутгийн хэсэг харуулсан тул ийм уриалга гаргасан аж.

Теодоро Локсин нь "Twitter" дээрээ "Энэ мөчөөс эхлэн би Dreamworks-ын бүх бүтээгдэхүүнд "бойкот" зарлаж байна. Зурмал анимац киног шууд хориглох нь Филиппиний Үндсэн хуульд харш тул иргэд өөрсдөө очиж үзэхээс татгалзах ёстой. Кино бүтээлд хяналт тавьдаг алба нь бүс нутгийн газрын зургийг харуулсан хэсгийг хайчилж авбал сайн байна" гэжээ.

Вьетнамд яг адил шалтгааны улмаас "Эверест" анимац киног хориглоод байгаа гэдгийг "Reuters" агентлаг онцолсон байна. Учир нь, Филиппин өөрийн гэдэг арлуудыг Вьетнам ч мөн адил өөрийн газар нутаг гэж үздэг аж.

Эверест анимац киног Америкийн "Dreamworks" компани нь Хятадын "Pearl Studio" компанитай хамтран бүтээсэн юм.

Өмнөд Хятадын тэнгис дэх Спратли олтриг, хажууд нь байрлах Параселийн арлууд ба тэдгээрийг тойрсон тэнгисийн ус нь олон жилийн турш Азийн хэд хэдэн улс хоорондын маргаантай бүс болж байгаа юм. Энэхүү олон жижиг арал, тэдгээрийг тойрсон эдийн засгийн онцгой бүстэй холбоотой маргаанд Вьетнам, БНХАУ, Бруней, Малайз, Филиппин, Тайван зэрэг улс орнууд янз бүрийн хэмжээнд татагдан оролцсон байгаа юм.

Эдгээр арлууд нь Энэтхэгийн ба Номхон далайн худалдааны замын зангилаан дээр байрладаг стратегийн чухал ач холбогдолтой. Түүнчлэн эдгээр жижиг арлуудыг тойрсон эрэг орчмын ёроолд ихээхэн хэмжээний газрын тос, шатдаг хий агуулагддаг нь тогтоогдсон бөгөөд маргаанд оролцсон улс бүр эдгээр түүхий эдийн олборлохыг хичээж байгаа юм.

Үүний өмнө Америкийн мэргэжлийн сагсан бөмбөгийн "Хьюстон Рокетс" клубын ерөнхий менежер Дэрил Мори нь аравдугаар сарын 5-нд "Эрх чөлөөний төлөө тэмцэж, Хонконгийг авар" гэсэн бичээс бүхий зураг Твиттер хуудсан дээрээ байршуулсан явдал гарч олны анхаарлыг татсан. Гэтэл Дэрил Морийн постыг хятад фэнүүд нь эрс шүүмжилж, эсэргүүцсэн мэдэгдэл олноор хийсний дараа постоо устгаж, клубын удирдлагууд нь хятад фэнүүдийн олон сая долларыг алдахгүй гэсэндээ уучлал гуйсан нь ихээхэн шүүмжлэл дагуулсан юм.