Б.ХУРЦ НАРЫН ЕСӨН ХҮНД ХОЛБОГДОХ ХЭРГИЙГ ДАХИН ХЭЛЭЛЦҮҮЛЭГТ ШИЛЖҮҮЛЭХЭЭР БОЛОВ

ТЕГ-ын дарга асан Б.Хурц, Улсын ерөнхий прокурорын орлогч асан Г.Эрдэнэбат нарын есөн хүн холбогдох бусдыг эрүүдэн шүүсэн, эрүүдэн шүүх ажлыг зохион байгуулсан, оролцсон гэх эрүүгийн хэргийн давж заалдах шатны шүүх хурал өчигдөр 10 цагт Төв аймгийн Зуунмод хотын сум дундын шүүхэд болсон юм.

Мэдээллийг эргэн сануулахад Б.Хурц, Г.Эрдэнэбат нарын есөн хүнд Нийслэлийн прокурорын газраас Эрүүгийн хуулийн 251, 133-р зүйл анги буюу "Хууль бусаар эрүүдэн шүүсэн", "Гүйцэтгэх ажлын хууль тогтоомж зөрчсөн" хэрэгт яллах дүгнэлт үйлдэн анхан шатны шүүхэд шилжүүлсэн юм. Анхан шатны шүүх хуралдаанаас "Хэргийн нотлох баримт хангалтгүй" хэмээн үзэж нэмэлт мөрдөн байцаалтад буцаасан боловч прокурор шүүхийн шийдвэрийг үл зөвшөөрч давж заалдах шатны шүүхэд эсэргүүцэл бичээд байсан юм.

Прокурорын эсэргүүцлийг өчигдөр Төв аймгийн Эрүү, Иргэний хэргийн давж заалдах шатны шүүхээр хэлэлцлээ. Шүүхээс эсэргүүцлийг хүлээн авч, анхан шатны шүүхийн тогтоолыг хүчингүй болгон, дахин хэлэлцүүлэгт буцаасан байна.