​ХОНКОНГИЙН ЗАСГИЙН ГАЗАР ЖАГСАГЧДЫГ ЭРС ШҮҮМЖЛЭВ

БНХАУ-ыг байгуулагдсан өдрөөр олныг хамарсан эмх замбараагүй байдал гаргасан сөрөг хүчний жагсагчдыг Хонконгийн Засгийн газраас эрс шүүмжилсэн мэдэгдэл гаргасан тухай "Синьхуа" агентлаг мэдээлж байна.

Жагсагчид нь цагдаа нар руу шатах шингэн шидэлж, олон нийтийн болон хувийн өмчийг санаатайгаар сүйтгэх, цагдаа нар руу дайрах, гудамж талбайг хаан бусдын чөлөөт хөдөлгөөнд саад хийх, гарсан түймрийг унтраалгахгүй байх зэрэг авир гаргасан гэж байна. Одоогоор цагдаа нарын эсрэг хүч хэрэг хэрэглэсэн, нийтийн эмх журмыг зөрчсөн хэргээр 180 гаруй хүнийг саатуулаад байгаа юм байна. Цагдаагийн 25 ажилтан жагсагчдын дайралтад өртөн шархаджээ.

Мөн Хонконгийн цагдаагийн газрын комиссар Стивен Ло нь аравдугаар сарын 1-нд цагдаа руу дайрсан нэгэн жагсагчийн эсрэг галт зэвсэг хэрэглэсэнтэй холбогдуулан мэдэгдэл хийжээ. Тэрээр цагдаагийн ажилтан өөрийгөө хамгаалахын эрхэнд хуулийн хүрээнд зөвшөөрөгдсөн үйлдэл хийсэн гэдгийг онцолжээ. Шархадсан жагсагч нь Ца овогтой 18 настай коллежийн оюутан байжээ. Буудуулсан оюутны биеийн байдал одоогоор тогтвортой байгаа тухай цагдаагийн газраас мэдэгдсэн байна. Энэ бол бараг дөрвөн сар үргэлжилсэн эсэргүүцлийн жагсаалын явцад жагсагчийн эсрэг галт зэвсэг хэрэглэсэн анхны батлагдсан тохиолдол болсон. Өмнө нь цагдаа нар байлдааны сумаар агаарт хий буудан анхааруулснаар хязгаарлаж байсан юм.