Сү.БАТБОЛДЫН 200 МЯНГАН ДОЛЛАРЫН АВЛИГЫН АСУУДЛААР ӨНӨӨДӨР Б.АСРАЛТ ГЭРЧТЭЙ НҮҮРЭЛДЭНЭ

Монгол Улсын Ерөнхий сайд асан, УИХ-ын гишүүн Сү.Батболд нь " И март" худалдааны төвийн газрыг авахын тулд 200.000 ам.долларын авилгыг бусдад өгсөн гэх асуудлаар АТГ-т шалгагдаж байгааг бид өмнө нь мэдээлсэн.

Баттай баримттай, мэдээллийг ил болгохгүй хэмээн эх сурвалж баримтаа дэлгэн, өөрийн нэр, албан байгууллагаа нууцлахыг хүссэн энэ мэдээллийг биднээр дамжуулсан юм.

Тэрбээр хуулийн байгууллагад ажиллаж байсан бөгөөд "надад Сү.Батболд 200,000 ам.долларыг бэлнээр болон дансаар өгсөн" гэдгээ хэлж, дансны хуулгаа харуулсан. Тухайн иргэний ам.долларын данс руу “Чингис хаан таун" компаниас 2013 оны намар 120.000 ам доллар орсон гүйлгээ ил болсон юм.

Энэхүү авилгын хэргийн гэрч, мэдээллийн эх сурвалж болсон иргэн “задалсан" мэдээллээ батлахын тулд УИХ-ын гишүүн Сү.Батболд, түүний туслахаар ажиллаж байсан Б.Асралт, Чингис хаан таун компанийн захирал Сү.Батболдын төрсөн ах С.Бат-Очир нартай “200 мянган долларын авилга өгсөн" гэх асуудлаар нүүрэлдэх хүсэлтийг Нийслэлийн прокурорт гаргажээ. Прокурорын байгууллагаас хэргийн оролцогч нарын мэдүүлэг зөрөөд байгаа учир нүүрэлдүүлэх зөвшөөрлийг олгосны дагуу энэ хэргийн гэрч иргэн С.Бат-Очиртай өчигдөр АТГ-т нүүрэлдсэн байна. Өнөөдөр АТГ-аас Гаалийн ерөнхий газрын дарга Б.Асралтыг дуудаж, тухайн иргэнтэй нүүрэлдүүлэх аж. Түүний дараа УИХ-ын гишүүн С.Батболдыг АТГ дуудах юм байна.