САЯТАН БОЛСОН Ч ТРАКТОРЫН ЖОЛООЧОО БОЛЬСОНГҮЙ

Америкийн Мэн мужид амьдардаг тракторын жолооч сугалаагаар сая доллар хожсон ч трактор барьж, хуучин ажлаа хийсээр байгаа тухай "Daily Mail" сонин мэдээлжээ.

Энэ оны тавдугаар сард БоббиСтюарт гэгч 65 настай тракторчин сугалаагаар 1 сая доллар хожсон бол дөрвөн сарын дараа дахин сугалгаа автал ахиад 100 мяннган доллар хожсон байна. Гэхдээ ингэж их мөнгө хожсон атал Стюарт нь амьдралын хэв маягаа огт өөрчлөөгүй, Кеннебанкпорт нэртэй жижигхэн тосгонд хуучин чиргүүл дэх байшиндаа амьдарсан хэвээр төдийгүй тракторчны ажлаа хийсэн хэвээр байгаа аж. Тэрээр энэ тухайд "Ер нь бол юу ч өөрчлөгдөөгүй дээ. Би өмнө нь хийдэг байсан зүйлээ л хийсээр" гэж хэлжээ.

Хамгийн эхлээд 1 сая доллар хожихдоо ажил ихтэй байснаас хожлынхоо мөнгийг долоо хоногийн дараа л очиж авсан аж. Сая доллар хожсон ч хямд кафед гамбургер, хот дог, шарсан төмс идсэн хэвээр гэдгээ сэтгүүлчдэд ярьсан байна. Гэнэт их мөнгө болсон хүн ихэнхдээ балмагдаад яахаа мэдэхгүй болдог, улмаар эд баялаг удирдах талаар зөвлөгөө өгдөг санхүүч, өмгөөлөгч хөлсөлж авдаг. Харин БобСтюарт огт тэгээгүй "Яасан гэж тийм хүмүүс хөлсөлж авах болж байна" гээд хожлынхоо тодорхой хувийг гурван хүүхдэдээ хувааж өгөөд юу дуртайгаа хий гээд үлдээсэн гэнэ. Бобын хүү Грег ч өмнө нь сугалаагаар 250 мянган доллар хожиж байжээ. Тэрээр аавынхаа тухай ярихдаа "Хүмүүс надаас аав чинь яагаад байшин худалдан авахгүй байгаа юм гэж асуудаг юм. Би хариуд нь зүгээр л хүсэхгүй байгаа юм аа гэж хэлдэг" гэсэн байна.

Бобын ах нь түүнд шинэ чиргүүлтэй байшин худалдаж авахыг санал болгож байсан ч тэртээ тэргүй санаанд нь нийцэж байгаа зүйлийг өөчлөхгүй гээд татгалзжээ.