ЕРӨНХИЙЛӨГЧ ПАРЛАМЕНТЫГ ТАРААХ ТУШААЛ ГАРГАВ

Перу улсын Ерөнхийлөгч Мартин Вискарра нь парламентаа тараах тушаал гаргасан тухайгаа "Facebook" хуудсаараа мэдээлсэн байна. Тэрээр "Би Үндсэн хуулийн дагуу Конгрессыг тарааж, шинэ сонгууль явуулахаар боллоо. Энэхүү онцгой арга хэмжээ нь сонгуульд оролцон саналаа өгөх замаар улс орныхоо ирээдүйг тодорхойлон байр сууриа илэрхийлэх боломжийг иргэдэд олгох юм" гэсэн байна.

Даваа гарагт Перугийн Сайд нарын зөвлөлийн тэргүүлэгч Сальвадор дель Солар нь Үндсэн хуулийн цэцийн гишүүдийг сонгох талаар гүйцэтгэх засаглал ба хууль тогтоох засаглалын хооронд зөрчил үүссэнтэй холбоотойгоор Засгийн газарт итгэлцэл үзүүлэх тухай асуудлыг парламентаар хэлэлцүүлэхээр оруулжээ. Үүний дараа парламентын гишүүд нь Үндсэн хуулийн цэцийн эхний гишүүнийг сонгосон байна. Гэтэл парламентын зүгээс Засгийн газар итгэлцэл үзүүлэх асуудлыг шийдээгүй байхдаа Үндсэн хуулийн цэцийн гишүүдийг сонговол парламентын тараах тухайгаа Ерөнхийлөгч анхааруулаад байснаа ийнхүү хэрэгжүүлжээ.