ХЭНТИЙ АЙМГИЙН ШШГГ ДЭРГЭДЭЭ “ЦЭЦЭРЛЭГ” БАЙГУУЛЛАА

Аймгийн Засаг даргын дэргэдэх хэрэгжүүлэгч агентлаг Шүүхийн Шийдвэр Гүйцэтгэх газар өөрсдийнхөө нөөц бололцоонд тулгуурлан албан хаагчдынхаа хүүхдүүдэд зориулсан цэцэрлэг байгуулжээ. Тодруулбал ашиглагдахаа больсон цайны газрын барилгаа завсарлаж нийт 14 сая гаруй төгрөгийн тоног төхөөрөмж, засвар үйлчилгээг хийжээ. Тус цэцэрлэг нь Хэрлэн сумын 7 дугаар цэцэрлэгийн салбар бүлэг бөгөөд 1 багш, 1 туслах багштай, 30 хүүхэд хүлээн авах хүчин чадалтай. Цэцэрлэгийн орчин саруул, цэвэр цэмцгэр, тохижилт нь хүүхдийн анхаарал, сонирхлыг татахуйц байлаа. Мөн хүүхдүүдэд сургуулийн өмнөх боловсролд заагдсан стандарт, мэдлэгийг олгож, улсын цэцэрлэгт явуулдаг, үйл ажиллагааг баримталж ажиллах аж. Ийнхүү ШШГГ нь дэргэдээ цэцэрлэг байгуулснаараа аймагтаа анхдагч болж байгаа тул аймгийн Засаг дарга Н.Ганбямба үйл ажиллагаатай нь танилцаж, тус цэцэрлэгт шаардлагатай байгаа принтерийг гардууллаа. Мөн төрийн байгууллага дэргэдээ цэцэрлэг байгуулж, ажилчдынхаа нийгмийн асуудлыг шийдвэрлэж, орон нутагтаа нэгэн шинэлэг ажлыг нэвтрүүлж байгаа тус хамт олонд талархал илэрхийлэв.