ОРОН НУТАГТ ЭЦСИЙН БҮТЭЭГДЭХҮҮН ҮЙЛДВЭРЛЭЖ ЗАХ ЗЭЭЛД НИЙЛҮҮЛЖ БАЙНА

Хэнтий аймагт худалдаа үйлчилгээ, барилга угсралт, тохижилт үйлчилгээний чиглэлээр үйл ажиллагаа явуулдаг Т.Болдбаатар захиралтай "Алсын солонго" ХХК нь орон нутагтаа анхдагч болж авто замын боржуур, явган хүний замын хашлага, хавтан, дээврийн өнгөт төмөр үйлдвэрлэдэг.

Үйлдвэрлэсэн бетоноо аймгийн ГХБХБГ-ын сорил шинжилгээний лабораторид шинжлүүлэхэд М300 маркийн, стандартад нийцсэн сайн чанарын бүтээгдэхүүн болох нь тогтоогджээ.

Тус үйлдвэрийн үйл ажиллагаатай Хэнтий аймгийн Засаг дарга Н.Ганбямба танилцаж, орон нутагт бүтээн байгуулалт хийж байгаа компаниудтай холбох, борлуулалтад дэмжлэг үзүүлэх талаар холбогдох хүмүүст үүрэг чиглэл өглөө. Мөн гүйцэтгэгч компанийн шалгуурт "орон нутагт үйлдвэрлэсэн бүтээгдэхүүнийг ашиглах" гэсэн заалт нэмж оруулах хэрэгтэйг анхаарууллаа.

Одоогоор эдгээр бүтээгдэхүүнээ Хэрлэн суманд хийгдэж байгаа авто замын ажлын гүйцэтгэгч компаниудад нийлүүлж байгаа бөгөөд сумд болон ААН-үүд зам талбай, дээврийн засвартаа түлхүү авч хэрэглэж байна. Учир нь орон нутагтаа үйлдвэрлэж байгаа тул тээврийн хөлс нэмэгдэхгүй мөн чанартай хэдий ч харьцангуй хямд үнэтэй тул иргэд ААН-үүд худалдан авах сонирхол өндөр байдаг байна.

"Алсын солонго" компани нь байгуулагдаад 19 жил болж байгаа бөгөөд үндсэн 12, гэрээт 10 гаруй ажилтантай. Энэ хугацаанд нийгмийн хариуцлагынхаа хүрээнд 3 дугаар багт байрлах цэцэрлэгт хүрээлэнгийн явган хүний замын хашлагыг хийж гүйцэтгэжээ. Мөн орон нутагт зохион байгуулагдаж байгаа тэмцээн уралдааныг ивээн тэтгэх, баг тамирчдад дэмжлэг үзүүлэх, залуу бизнес эрхлэгчийн дэмжих чиглэлээр нэлээдгүй ажлуудыг хийдэг хувийн хэвшлийн шилдэг байгууллагын нэг юм.

Хэнтийчүүд халуун зунаас эхлэн өвөлжилтийнхээ бэлтгэл ажлыг хангажээ. Тухайлбал Хэнтий ус ХХК уурын зуухнуудынхаа дулаан алдалтын багасгахаар нилээд хэмжээний засвар үйлчилгээг хийж, 2 5 6 7 дугаар зуухнуудад шинээр тогоо нэмж тавьжээ.Мөн Цэвэр усны 4160 мерт шугамыг бүрэн шинэчилсэн бол эх үүсвэрийн худагтаа цэвэр усны ариутгал халдваргүйжүүлэлтийн аппаратыг суурилуулж, бүрэн автоматжуулснаас гадна 10 худгийг ухаалаг системд холбож иргэдэд 24 цагийн турш уст цэгээр үйлчилж байна.Эдгээр ажлуудад энэ оны байдлаар 360 гаруй сая төгрөгийг хөрөнгө зарцуулсан бөгөөд өвөлжилтийн бэлтгэл ажил 90 орчим хувьтай үргэлжилж байна.