​ЗОХИОМОЛ АРГААР АРЬСАА БОРЛУУЛАХ ДУРТАЙ ЭМЭГТЭЙ ХАМАРГҮЙ БОЛЖЭЭ

Ерөнхийлөгч Трамп гэх мэт олны танил хүмүүс, шоу бизнесийн одууд хэт ягаан туяаны төхөөрөмж ашиглан зохиомлоор арьсаа борлуулах дуртай байдаг. Одуудтай адил харагдахыг хүсдэг иргэд үүнийг нь дуурайх нь элбэг.

Ийм хүмүүсийн нэг Америкийн Оклахома мужийн Моррисон нэртэй хотод амьдардаг эмэгтэй зохиомол аргаар арьсаа хэт их борлуулсны улмаас арьсны хорт хавдар тусаж, хамаргүй болсон тухай "Unilad" мэдээлсэн байна.

Ребека Рапп гэдэг эмэгтэй өсвөр наснаасаа эхлэн долоо хоногт зургаан өдөр хүртэл хэт ягаан туяаны төхөөрөмж ашиглан арьсаа борлуулдаг байж. Орчин тойрны хүмүүс ингэж зохиомол аргаар хэт борлох нь муу талаар анхааруулж байсан ч Ребека нь арьс нь одуудынхтай адил толигор, гялалзсан харагддаг гэж үзээд тоохгүй байж.

Гэтэл 2018 оны наймдугаар сард хацар дээр нь бараан толбо гарсныг хараад эмчид үзүүлсэн байна. Эмч нарийн шинжилгээ хийхэд арьсны хорт хавдар туссан болох нь илэрчээ. Иймд Ребекагийн амь насыг аврахыг тулд яаралтай хагалгаа хийж нүүрнийх нь хорт хавдар тархсан арьсыг бүхэлд нь авсан байна. Үүний дараа Ребека хамаргүй болжээ. Иймд эмч нар түүний духны арьснаас хэсэгчлэн авч хамрын нүхийг нь тагласан аж. Ребека нь бусад эмэгтэйчүүдийг арьсандаа анхаарч, нарнаас хамгаалах хэрэгсэл идэвхтэй ашиглаж, зохиомол аргаар борлохдоо хэтрүүлэхүй байхыг сэрэмжлүүлэх үүднээс өөрт тохиолдсон таагүй явдлаа бусадтай хуваалцахаар шийдсэн аж.