​ПАКИСТАНД ҮҮРЛЭСЭН АЛАН ХЯДАГЧИД ЭНЭТХЭГ РҮҮ ДАЙРАХААР ЗЭХЭЖ БАЙНА

Энэтхэгийн хуурай замын хүчний штабын дарга Бипин Рават генерал энэ тухай мэдээснийг Энэтхэгийн "NDTV Khabar" мэдээлжээ. Түүний мэдээлснээр Пакистаны Балакот дахь "Жаиш-е-Мухаммад" алан хядах бүлэглэлийн бэлтгэлийн төвд 500 гаруй зэвсэгт этгээд бэлэн байдалд орж, тушаал хүлээж байгаа гэсэн байна. Тэднийг Энэтхэгийн Кашмир муж руу нууцаар нэвтэрч, энэтхэг цагдаа, цэргийнхний эсрэг алан хядах ажиллагаа явуулахаар зэхэж байгаа гэлээ. Иймд шаардлагатай гэж үзвэл Энэтхэгийн тал Пакистан дахь алан хядагчдын төвд агаараас цохилт өгөхийг үгүйсгэсэнгүй. 2019 оны хоёрдугаар сарын 26-нд Энэтхэгийн Цэргийн нисэх хүчний онгоцнууд Пакистаны Балакот дахь "Жаиш-е-Мухаммад" бүлэглэлийн төв рүү агаараас цохилт өгч байсан юм. Энэ арга хэмжээ нь хоёрдугаар сарын 14-нд тус төвд бэлтгэгдсэн амиа золиослогч Энэтхэгийн Төв нөөцийн цагдаагийн хүч "CRPF"-ийи цуваа руу дайрч 40 хүний аминд хүрсний хариу болж байсан.