​ГЮЛЕНИЙ ХУВИЙН СУРГУУЛИУДЫГ АЮУЛТАЙ ГЭЖ АНХААРУУЛАВ

Туркийн Ерөнхийлөгчийн Захиргааны олон нийттэй харилцах удирдах газрын тэргүүн Фахретин Алтун доктор нь Twitter-ээрээ дамжуулан америкчуудад Фетхуллах Гюлений удирддаг хөдөлгөөний аюулын талаар анхааруулжээ. Анхааруулгад "Гюлений хөдөлгөөн нь дэлхийн нийтэд аюултай, түүний сургуулиуд америкийн татвар төлөгчдийн мөнгийг хэрэглэдэг, бусдыг сэм удирдах хууль бус арга ашиглан хар мөртэй ажлаа хийсэн хэвээр байна". Мөн "Хүндэт америкчууд аа, хэрэв Гюлений хөдөлгөөнийг зөвхөн Туркийн асуудал гэж бодож байгаа бол та нар эндүүрч байна, надад итгээрэй. Энэхүү хорон муугийн байгууллага нь танай татвар төлөгчдийн мөнгөнд гар хүрсэн цагаас та нарын ч асуудал болж хувирсан. Анхааралтай байцгаагаарай, тэд хаа сайгүй бий шүү" гэжээ. "Дэлхийн хамгийн нөлөөтэй лалын шашинтан" гэгддэг Фетхулла Гюленийг Туркийн эрх баригчид 2016 оны долоодугаар сарын 16-нд гарсан төрийн эргэлт хийх оролдлогыг зохион байгуулсан гэж үздэг. Америкийн удирдлагад хандан Гюленийг баривчлан шилжүүлж өгөхийг удаа дараа шаардсан ч татгалзсан хариу авсан. Иймд дэлхийн 140 оронд үйл ажиллагаа явуулдаг "Хизмет" хөдөлгөөний байгуулсан сургуулиудыг хаах талаар нэлээд арга хэмжээ авсан байдаг. Зарим улсад Туркийн эрх баригчдын шаардлага, шахалтаар сургуулиудыг хааж, заримд нь багш нарын бүрэлдэхүүнийг сольж, заримд нь сургуулиудыг шууд улсын мэдэлд авсан байдаг ч дийлэнх улс оронд Туркийн эрх баригчдын "FETO" гэж нэрлэсэн "Хизмет" хөдөлгөөний сургуулиуд хэвийн үйл ажиллагаа явуулсаар байгаа юм.