​АМЕРИКТ ШАРТВАЛ ДАМПУУРНА

Архи, согтууруулах ундаа хэтрүүлэн хэрэглэх нь эрүүл мэндэд тун хортойгоос гадна хүний санхүүгийн байдалд хамгийн сөргөөр нөлөөлдөг. Жишээлбэл, Америкийн Колорадо мужийн Лавленд хотод амьдардаг залуу хуримын өмнө найз нартайгаа үдэшлэг хийсний дараа шарталтаа эмчлүүлээд дампуурахаа шахсан тухай "NPR" сайт сонирхуулсан байна.

Кэмерон Фишер гэгч 30 настай залуу хуримын өмнөх найз нөхдийн хамт үдэлтийн найр хийгээд маргааш нь хүнд шартжээ. Бие нь тун муу байсан тул сүйт бүсгүй нь эмчид үзүүлэхийг шаардсан байна. Иймд сүйт залуу нь ойролцоох яаралтай тусламжийн төвд ханджээ. Тэнд нь өвчтөн байхгүй, зөвхөн эмч хоёр, хоёр сувилагч л жижүүрлэж байж. Кэмерон өөрт тохиолдоод байгаа зүйлийн талаар хэлж, хар тамхи хэрэглээгүй гэдгээ тайлбарласны дараа түүнд хоёр ширхэг дусал залгаж, дотор муухайрахыг арилгадаг эм уулган цусны шинжилгээ аваад гэрт нь хариулж. Гэтэл хуримын дараа эмнэлгээс түүнд 12,5 мянган долларын тооцооны хуудас ирэхэд залуу хосууд маш эвгүй байдалд оржээ. Учир нь, энэ мөнгө тэдний хуримдаа зарцуулснаас хоёр дахин үнэтэй байж.

Фишер эмнэлгийн гаргасан төлбөр бодит байдалд нийцэхгүй байгаа талаар холбогдох албадад хандан гомдол гаргасны дараа төлбөрийг нь хоёр дахин багасгаад 4,5 мянган доллар болгосон байна. Эрүүл мэндийн даатгалаар энэ мөнгөний талыг барагдуулсан ч үлдсэн мөнгө нь шинэхэн гэрлэсэн хосуудад тун хүнд туссан байна.