ОРОСЫГ ТОКИОГИЙН ОЛИМПООС ХАСАЖ МАГАДГҮЙ

Оросын допингийн эсрэг агентлаг РУСАДА-аас Дэлхийн допингийн эсрэг агентлаг ВАДА-д дамжуулан өгсөн мэдээлэлд үл нийцэл гарсан тул ОХУ-ыг Токиогийн олимпын тоглолтоос хасаж магадгүй болсон тухай "Reuters" агентлаг мэдээлж байна. Тодруулбал, Оросын тамирчдын хэдэн мянган допинг шинжилгээний дүнг хадгалж байдаг Москвагийн лабораториос өгсөн өгөгдлүүдэд дүн шинжилгээ хийсэн Журам мөрдлөгийн хороо нь үл нийцэл гарсан тухайд ВАДА-д мэдээлсэн байна. Үүний үр дүнд нь РУСАДА нь 2018 оны есдүгээр сард арай хийж сэргээгээд байсан статусаа ахин алдаж магадгүй боллоо. Хэрэв РУСАДА нь ахин олон улсын статусаа алдвал тамирчдынхаа допингийн эсрэг дүрмийн мөрдлөгийг хангаж чадахгүй болсон гэж үзээд 2020 оны Токиогийн олимпын тоглолтод Оросын тамирчдыг оролцуулахгүй байдал үүсэж магадгүй болжээ. Одоо тамирчдын допинг тестын мэдээлэл дамжуулахад оролцож байсан талууд нь үүссэн маргааныг гурван долоо хоногийн дотор амжиж шийдэх ёстой гэж ВАДА үзэж байгаа аж. Энэ хугацаанд нэг бол Оросын талыг ямар ч алдаа гаргаагүй гэдгийг тогтоох, үгүй бол эргэлзээтэй мэдээлэлтэй холбоотой хүмүүсийн нэрийг дурдах ёстой болох аж.