​D АМИН ДЭМИЙН ДУТАГДАЛ БА ДУНД НАСНЫ ХҮМҮҮСИЙН ЭРТ НАС БАРАЛТ ХООРОНДОО ХОЛБООТОЙ

Бие дэх D амин дэмийн дутагдал ба дунд болон залуу насны хүмүүсийн дундах эрт нас баралт нь хоорондоо шууд хамааралтай байдгийг эрдэмтэд илрүүлсэн тухай EurekAlert мэдээлжээ. D амин дэмийн бага агуулга нийт нас баралт, түүн дотроо аливаа нэг өвчний улмаас үүссэн нас баралттай ямар холбоотой байдгийг Венийн их сургуулийн эрдэмтэд судалсан байна. Судалгаанд 1991 оноос 2011 онуудад 78 мянга 581 хүний өгөгдлийг хамруулсан шинжлэхдээ тэдний бие дэх D амин дэмийн агуулгыг харьцуулсан байна. Цусан дахь D амин дэмийн хэмжээ 50 нмоль/л байхыг хэвийн, 10 нмоль /л байхыг доогуур, 90 нмоль /л байхыг өндөр гэж тооцон судалсан. Ингэхэд D амин дэмийн агуулга бага байх нь нас баралтын эрдлийг гурав дахин нэмэгдүүлж байгааг тогтоожээ. 45-60 насны бүлэгт хамаарах өвчтөнүүд энэ эрсдэлд хамгийн их өртөж байж. Харин D амин дэмийн агуулга өндөр байх нь янз бүрийн шалтгаантай нас баралтыг статистик дунджаас 30-40 хувь багасгаж байжээ. D амин дэмийн дутагдлыг дагаад зүрх судасны эмгэг, өмөн, чихрийн шижин зэрэг эмгэг үүсэж байсан нь нас баралтын үндсэн шалтгаан болж байж. Түүнчлэн энэ судалгааны үеэр цусан дахь D амин дэмийн агуулга 100 нмоль/л хэмжээнээс өндөр байх нь хүний биед хүчтэй сөрөг нөлөө үзүүлдэггүй болохыг тогтоожээ. Ийм үр дүн нь D амин дэмийг шаардлагатайгаас хэтрүүлэн хэрэглэхтэй холбоотой янз бүрийн сөрөг үр дагаврын талаарх зовнилыг багасахад нөлөөлнө гэж үзжээ.