САУДЫН АРАБ НЬ АЛАН ХЯДАХ ДАЙРАЛТТАЙ ХОЛБООТОЙ МЭДЭЭЛЛИЙГ ДЭЛГЭЛЭЭ

Есдүгээр сарын 14-ний шөнө Саудын Арабийн газрын тос олборлох байгууламжууд руу хийсэн дайралтыг 10 дрон гүйцэтгэсэн тухай мэдээ тархаад байсан. Иймд Саудын Арабийн тал хэвлэлийн бага хурал хийж, дайралттай холбоотой зарим мэдээллийг олон нийтэд танилцуулжээ.

Саудын Арабийн армийн төлөөлөгч Турки аль Маликийн мэдээлснээр Абкайк дахь байгууламж руу 18 дрон, дөрвөн далавчит пуужин ашиглан дайрсан. Харин Хурайс дахь байгууламжууд руу гурван далавчит пуужингаар дайрсан юм байна. Далавчит пуужингуудыг Иранд үйлдвэрлэсэн байж магадгүй тухай аль Малики мэдээлсэн ч дрон ба далавчит пуужинг харвасан газрыг заасангүй.

Энэхүү дайралтыг Йемений хусит босогчдын "Аллах Ансар" бүлэглэл үйлдсэн гэдгээ албан ёсоор мэдэгдсэн ч АНУ нь дайралтыг бурууг Иранд тохсоор байгаа юм.

Энэ зуур Йемений хусит босогчид мэдэгдэл хийж Саудын Араб руу ямар дрон ашиглаж дайрснаар харуулсан байна. Хусит босогчдын төлөөлөгч нь "Аль Масира" сувгийн шууд нэвтрүүлэгт оролцохдоо газрын тосны байгууламжуудын дайралтын өмнө ба дараа нь авсан зургуудыг харуулжээ. Хуситууд илүү хол зайн нисдэг шинэ үеийн дронууд ашиглан, гурван өөр зүгээс дайралт хийсэн гэсэн байна. Хуситуудын төлөөлөгч нь "Дайралт хийхэд ашигласан Касеф, Саммад-3 дронууд нь 1,7 мянган км зайнд нисэх, тус бүр нь гурван пуужин тээвэрлэх чадвартай" гэжээ.