ТАЛИЙГААЧИЙН АР ГЭР: АЛДАА ГАРГАСАН ХҮНД АЛБАН ТУШААЛ ӨГӨХ НЬ ШАГНАЛ УУ

Өнгөрсөн тавдугаар сарын 30-31-нд шилжих шөнө Өргөө амаржих газарт 37 настай, жирэмсэн эх амиа алдсан харамсалтай хэрэг гарсан. Тодруулбал, гурван хүүхдийн эх Ч дөрөвдэх хүүхдээ төрүүлэхээр тус эмнэлэгт хэвтээд байсан бөгөөд кесаров хагалгаа хийлгэх заалттай өдрөө төлөвлүүлэн хэвтэж байхдаа ийнхүү амиа алдсан юм.

Энэ асуудлаас үүдэн нийслэлийн Эрүүл мэндийн газрын дарга Л.Төмөрбаатар тушаал гарган, Өргөө амаржих газрын дарга Г.Баясгаланг ажлаас нь чөлөөлсөн. Харин түүний албан тушаалыг өнөөдрийг хүртэл тус эмнэлгийн Эмчилгээ эрхэлсэн орлогч дарга А.Дүүрэнбилэг түр гүйцэтгэж байгаа юм. Үүнд талийгаачийн ар гэрийнхэн гомдолтой байна. Тодруулбал, эмчилгээний явцад алдаа гаргаж, хүний амь нас хохирсон байхад Эмчилгээ эрхэлсэн орлогч даргыг албан тушаал ахиулж байгаа нь шагнаж байгаагаас өөрцгүй хэрэг хэмээн үзэж, НЭМГ-т өргөдөл гомдлоо гаргажээ. Тэднийг НЭМГ-ын Орлогч дарга Л.Зэндмаа хүлээн авч уулзсан бөгөөд "Даргын үүргийг гүйцэтгэх өөр хүн олдохгүй байна" гэсэн тайлбар хэлжээ.
Хэргийг тодруулбал, эх болоод урагт хийсэн Шүүхийн шинжилгээний үндэсний хүрээлэнгийн дүгнэлтэд "Ургийн жин 3250 гр, өндөр 52 см, эрэгтэй хүүхэд. Эхийн зүүн талын 1-4-р хавирга хугаралтай. Энэ хугарал нь амьд байхад нь үүссэн. Кесаров хагалгааг эрт хийх байжээ. Эх уушги, зүрхний шокийн улмаас амь насаа алдсан байна" хэмээн тусгасан байдаг.