УИХ-ЫГ ТАРААЖ, САНАЛ АСУУЛГАТАЙ ЗЭРЭГЦЭН СОНГУУЛЬ ЯВУУЛАХ АСУУДАЛ ЯРИГДАЖ ЭХЭЛЖЭЭ

Үндсэн хуулийн нэмэлт өөрчлөлттэй холбоотой ард нийтийн санал асуулга авахаар төлөвлөж хуулийн төслийн эх бэлэн болсон талаар зарим эх сурвалжууд мэдээлж байв. Ард нийтийн санал асуулгыг 10 дугаар сарын 30, 31-нд байлгахаар төлөвлөж 29 тэрбум төгрөг зарцуулах талаар яригдаж байв. Гэхдээ батлагдаагүй учир санал асуулгын хугацаа, төсөв баттай биш гэсэн үг. Өчигдөр УИХ-ын дарга Г.Занданшатар сэтгүүлчидтэй уулзах үеэрээ УИХ-ыг тарааж ард нийтийн санал асуулгатай зэрэгцэн сонгууль явуулах талаар ярьжээ. Мөн энэ асуудал нь УИХ-ын даргын дэргэдэх зөвлөл болон гишүүдийн түвшинд яригдаж байгаа юм байна. УИХ-ын дарга Г.Занданшатарын хэлснээр Энэ бол боломжит хувилбар. Ард нийтийн санал асуулгынхаа ирцийг хүргэх, ардчиллаа аврах, парламентын засаглалаа хамгаалж үлдэх үүднээс ийм санаачилга гаргая гэж ярьжээ.